Shymkenttegi Nursát móltekaýdanynda bes qabatty turǵyn úide gaz-aýa qospasynyń jarylysy oryn aldy. Oqiǵanyń saldarynan páter jaldap turyp jatqan Resei Federatsiiasynyń 63 jastaǵy azamaty dene jaraqatyn alyp, oǵan alǵashqy meditsinalyq kómek kórsetilgen, dep habarlaidy "Ult aqparat".
Qalalyq TJD baspasóz qyzmetiniń málimetinshe, jarylys tańǵy saǵat 06:27 shamasynda úidiń birinshi qabatyndaǵy páterde bolǵan. Saldarynan terezeler men esikter synyp, úi zattary men jihazdary janyp ketken. Turǵyn úidegi 4 adam qaýipsiz jerge shyǵarylyp, taǵy 6 adam qutqarylǵan. Sondai-aq, jarylys saldarynan kórshiles ornalasqan eki páterdiń terezeleri, «Aýdi» avtokóliginiń aldyńǵy áinegi zaqymdalǵan. Oqiǵa ornyna Shymkent qalasy TJD Órt sóndirý qyzmetiniń 29 jeke quramy men 6 tehnikasy, Apattar meditsina ortalyǵy filialynyń, jedel-qutqarý jasaǵynyń 8 qyzmetkeri men 2 tehnikasy, Politsiia departamentiniń 20 qyzmetkeri men 7 tehnikasy jumyldyrylǵan.
«Jalyn tańǵy saǵat 06.42-de oqshaýlanyp, saǵat 07.20-da tolyǵymen sóndirildi. Órttiń jalpy kólemi 35 sharshy metr quraǵan. Gaz sharýashylyǵy qyzmetiniń aldyn ala málimetinshe, jarylysqa gazdyń jinalýy sebep», - delingen habarlamada.
