Shymkentte bas dárigeri qamaýǵa alynǵan aýrýhanaǵa ýaqytsha jańa basshy taǵaiyndaldy. Qalalyq Densaýlyq saqtaý basqarmasy basshysynyń buiryǵymen bul qyzmetti bas dárigerdiń orynbasary bolǵan Shyńǵys Baimenov atqaratyn boldy, dep habarlaidy "Ult aqparat".
Búgin Densaýlyq saqtaý basqarmasynyń basshysy Ashan Baidývaliev «№1 qalalyq klinikalyq aýrýhanasyna baryp, ujymmen kezdesti. Jabyq jaǵdaida ótken basqosýda bas dárigerdiń ýaqytsha mindetin atqarýshy retinde Shyńǵys Baimenovty tanystyrdy. Aita keteiik, Shyńǵys Bolatuly buǵan deiin atalǵan aýrýhanada bas dárigerdiń hirýrgiia salasy jóninde orynbasary qyzmetin atqarǵan.
Basqarma basshysy sondai-aq BAQ ókilderine suhbat berip, oryn alǵan qylmystyq jaǵdaiǵa bailanysty pikirin bildirip ótti. Ol bolǵan jáitti áleýmettik jelilerden kórip, habardar bolǵanyn aitady.
«Bolǵan jáitke bailanysty keshe Densaýlyq saqtaý ministrine Eljan Birtanovqa, qalanyń ákimi Erlan Aitahanovqa negizgi málimetterdi jiberdim. Barlyq málimetterdi jazbasha túrde jiberdik. Endi qazir aýrýhananyń ujymyna kelip, osy kisilermen kezdesip, júzdesip, búgingi tańǵa barlyqtarymyzdy sabyrlyq saqtaiyq dep túsindirdim. Negizi barlyǵy zańmen bolý kerek, birinshiden. Ekinshiden, oqiǵanyń anyq-qanyǵyna jetý kerek. Úshinshiden, moraldyq –etikalyq normalarymyzdy da saqtaýymyz kerekpiz. Búgingi tańda № 1 qalalyq aýrýhananyń bas dárigeriniń mindetin atqarýshy etip Shyńǵys Bolatulyn qoidyq»,- dedi Ashan Baidývaliev.
Tilshilerdiń osy qylmysqa qanshalyqty senesiz degen saýalyna basqarma basshysy dál qazir eshteńe aita almaitynyn, moraldyq-etikalyq normalardy saqtaý kerektigin aityp ótti. Sondai-aq, ýaqytsha tergeý abaqtysyna qamalǵan bas dáriger Abylai Donbaiǵa qandaida bir minezdeme berýden bas tartyp, tergeýdiń sońyn kútýge shaqyrdy.
«Qazir men eshteńe aita almaimyn, kóreiik, barlyǵyn kúteiik. Minezdemeni de bere almaimyn. Bári anyqtalǵan soń, biz resmi túrde jariialaimyz»,- dedi basqarma basshysy.
Aita keteiik, kúni keshe elimizdiń IIM Tergeý departamenti Shymkent qalalyq №1 klinikalyq aýrýhanasynyń bas dárigeri ýaqytsha oqshaýlaǵyshqa qamaǵanyn habarlaǵan bolatynbyz. Oǵan QR QK 264-baby 2-tarmaǵynda (transulttyq qylmystyq topqa qatysý) jáne 116-baby 3-tarmaǵynda (adam aǵzasyn zańsyz alý) kózdelgen qylmystyq quqyq buzýshylyqqa jol berdi degen aiyp taǵylǵany jariia etilgen. Vedomstvonyń málimetinshe, sotqa deiingi tergeý barysynda 2017-2018 jyldary Qazaqstan aýmaǵynda uiymdastyrýshysy shet memlekettiń azamaty bolyp tabylatyn qylmystyq top adam aǵzalaryn transplantatsiialaý boiynsha áreket etken. Donor retinde turmystyq aýyr jaǵdaiǵa tap bolýy saldarynan búirekterin satýǵa májbúr bolǵan Ózbekstan, Qyrǵyzstan, Ýkraina azamattary tartylǵan. Al retsipientter alys shet elderdiń, negizinen Izraildiń qaltaly azamattary bolǵan.
