Shymkentte aýǵan soǵysynda mert bolǵan jaýyngerdiń anasyna baspana berildi. 35 jyl buryn 18 jastaǵy ulyn soǵysqa attandyryp keiin, qaita kóre almaǵan anaǵa 2 bólmeli páter buiyrdy, dep habarlaidy QazAqparat tilshisi.
Jat jerde kóz jumǵan Ábdirahman Gúlshara apaidyń uldan tuńǵyshy edi. Ol áskerge joǵary bilim alyp júrgen jerinen attanady. Keiin áskeri boryshyn ótep júrip aýǵan jerindegi urystarǵa qatysqan. Sóitip, jaralanǵan jaýyngerdi qutqarý kezinde ózi oqqa ushyp, jan tapsyrady. Búginde batyr uldyń erligi jaily estelikter kóp. Onyń batyldyǵy jaily sýretter de syr shertetindei. Endi mine sol erligi bilik tarapynan da baǵalanyp otyr. Ábdirahmannyń artynda aman qalǵan anasy men baýyryna eki bólmeli páter berilip otyr. Baspana sýretine qaraǵanda qabyrǵasy qaiysyp, ulynyń esimin esine alǵanda eziletin ananyń kóńiline jubanysh boldy.
«2006 jyly balamnyń atynan kezekke turdym. Sebebi, osy kúnge deiin páter jaldap júrgen edik. Endi mine baspanaly bolyp qýanyp jatyrmyz. Araǵa 35 jyl salyp qaza tapqan balamnyń rýhyna kórsetilgen izet bolǵandai bul», - deidi Gúlshara Jumalieva.
Búginde óńirde aýǵan soǵysyna qatysyp, qaza tapqan 96 jaýyngerdiń otbasy bar. Odan bólek 100-ge jýyq ardager baspana kezeginde tur. Olar 10 jyldai ýaqyttan beri kezegin kútip keledi.
«Bul kezek 4-5 jyldyń kóleminde jylji bastady. Shymkentte úiler salyna bastaǵannan toqtap qalǵan osy aýǵan soǵysy ardagerleriniń kezegi kelip jatyr. Oǵan ardagerler atynan alǵysymyzdy aitamyz», - deidi Oblystyq aýǵan jáne jergilikti soǵyn ardagerleri odaǵynyń tóraǵasy.
