Shymkentte áskeri bólimnen qarý-jaraq urlap satqan sarbazǵa qatysty úkim shyqty. Sot basty aiyptalýshyny 10 jylǵa bas bostandyǵynan aiyrdy, dep habarlaidy "Ult aqparat".
Budan bólek sot úkimi onymen sybailas boldy degen ózge de aiyptalýshylarǵa shyqty. Olardyń ekeýi, iaǵni qarý urlaýǵa kómektesken sottalýshynyń aýyldastary endi aldaǵy 8 jylyn temir torda ótkizedi. Taǵy biri - 5 jylǵa, úsheýi úsh jylǵa sottaldy.
Aiypty dep tanylǵan segizinshi azamat sot zalynan bosatyldy. Qylmysqa sybailas bolǵan ekinshi kýrs stýdenti Bekjan Sanjar memleketke 500 AEK iaǵni, 1 mln teńge aiyppul tóleitin boldy. Biraq, qylmystyq istiń bas tulǵasy dep tanylǵan Abylai Balǵynbai atalǵan jazamen kelispeidi.
Eske sala keteiik, ol buǵan deiin urlyqqa komandiriniń buiryǵymen barǵanyn aitqan edi. Al, sot úkimi 10 kúnnen keiin kúshine enedi. Sarbazdy ustaý operatsiiasyn IIM men UQK arnaiy jedel toby birigip júrgizgen. Áleýmettik jelilerde Abylai Balǵynbai esimdi sarbazdyń Ordabasy aýdany Badam stantsiiasy mańyndaǵy áskeri bólimnen 30 AK-74 avtomatyn, 27 PM tapanshasyn, 400 dana 5,45 oǵyn alyp qashqany týraly aqparat taraǵan.
