Mańǵystaý oblysynda áleýmettik jeli arqyly alaiaqtyq jasady degen kúdikpen tanymal bloger qamaýǵa alyndy, dep habarlaidy ult.kz.
Oblystyq politsiia departamentiniń málimetinshe, kúdikti Qytaidan premiým sanattaǵy ydys-aiaq pen turmystyq tehnikany naryqtaǵy baǵadan edáýir arzanǵa jetkizýdi jarnamalaǵan. Jarnamaǵa 360 myńnan astam oqyrmany bar akkaýnt tartylǵan.
Azamattar taýar aqysyn jeke kásipkerdiń shotyna aýdarǵanymen, tapsyrystar jetkizilmegen. Tergeý nusqasy boiynsha, túsken qarajat jeke maqsattarǵa jumsalǵan.
Atalǵan derek boiynsha Qylmystyq kodekstiń 190-babymen is qozǵaldy. Kúdikti ýaqytsha ustaý izoliatoryna qamaldy. Tergeý jalǵasyp jatyr.
