Shymkent qalasynda aldaǵy jyly jaiaý júrginshilerge arnalǵan «Arbat» jobasy men eski qalashyq kesheni júzege asyrylatyn bolady, dep habarlaidy "Ult aqparat" ákimniń baspasóz qyzmetine silteme jasap.
Búgin bul týraly Óńirlik kommýnikatsiialyq ortalyǵynda ótken baspasóz máslihatynda oblystyq Sáýlet jáne qala qurylysy basqarmasynyń basshysy Erkin Júsipov málim etti.
Budan bólek, oblys ákiminiń bastamasymen «Ordabasy» memorialdyq tarihi-mádeni kesheni mańynda úsh bidiń eskertkishi ornatylyp, «Qazyǵurt» tarihi-etnografiialyq kesheni boi kótermek.
Basqarma basshysynyń aitýynsha, 2017 jyldyń 9 aiynda oblystyq sáýlet jáne qala qurylysy basqarmasy 393 mln 978,3 myń teńgeni igergen. Bul qarjyǵa biyl Arys qalasynyń bas josparyna ózgerister engizilip, Shymkent qalasynyń bas josparyn ózektendirý (aktýalizatsiia) jobasy daiarlanǵan.
Sondai-aq, «Qarashash ana», «Ibrahim ata», «Qyzyr Paiǵambar», «Ábdel Áziz baba», «Miráli baba» keseneleri men «Kóne Otyrar» sáýlettik jobasyn abattandyrý, jańǵyrtý maqsatynda jobalar daiarlanǵan. «Búginde Shymkent-Qasqasý jáne Shymkent-Sairam-Tólebi aýdandaryna shyǵatyn balamaly joldyń jobasy ázirlendi. Shymkent qalasy aýmaǵyndaǵy 6 shatqalǵa eskizdik jobalary jasalyp, investorlardyń esebinen iske asyrylýda. Sonymen qatar, qoldanystaǵy áýejaidyń Qorǵanys ministrliginiń teńgeriminde bolýyna bailanysty jańa áýejaidyń 3 nusqasy daiyndalyp otyr», - dedi Erkin Naýryzbaiuly.
Elbasynyń «Bolashaqqa baǵdar: rýhani jańǵyrý» maqalasy aiasynda oblys aýmaǵynda qaita jańǵyrtýdy talap etetin 500 eskertkish anyqtalypty. Olardyń qatarynda Shymkent qalasyndaǵy «Eski qalashyq», «Qazyǵurt» tarihi-etnografiialyq kesheni, «Qaraýyl tóbe», «Kerýen sarai», «Qoshqar ata», «Ordabasy» memorialdyq tarihi-mádeni keshenderi de bar. Budan bólek, «Arystanbab» mavzoleiiniń kireberis bóligi men joldaryn abattandyrý kózdelip otyr. Sondai aq, basqarma Shymkent qala ishilik joldaryndaǵy 12 jolaiyryǵynyń eskizdik jobasyn ázirlepti. Onyń ishinde 5 jolaiyryqtyń qurylysyn 2018 jyly iske asyrý josparlanǵan.
