Foto: ashyq derekkóz
Qarjylyq monitoring agenttiginiń Shymkent qalasy boiynsha departamenti intensivti alma baqtaryn qurýǵa bólingen biýdjet qarajatyn jymqyrý faktisi boiynsha tergeýdi aiaqtaǵany týraly, dep habarlaidy Ult.kz.
Vedomstvo málimetinshe, «Intensivti alma baqtaryn daiyn kúiinde tapsyrý» baǵdarlamasy aiasynda jobalar «Aýyl sharýashylyǵyn qarjylai qoldaý qory» AQ arqyly qarjylandyrylǵan. Baǵdarlamanyń maqsaty – daiyn infraqurylymy bar jerlerdi kásipkerlerge lizingke berý bolǵan.
Tergeý barysynda Qordyń burynǵy basqarma tóraǵasy J.D. Omarovtyń ózine qarasty tulǵalar men uiymdardy, onyń ishinde «Green Mart Kazakhstan» JShS-in tarta otyryp, biýdjet qarajatyn jymqyrý shemasyn uiymdastyrǵany anyqtalǵan. Satyp alý rásimderi zań talaptaryn buza otyryp, negizinen bir kózden júrgizilgen, nátijesinde jabdyqtar men qurylys jumystarynyń quny jasandy túrde ósirilip, keibir jumystar múlde oryndalmaǵan.
Soǵan qaramastan, jalǵan qabyldaý-tapsyrý aktileri rásimdelip, sol arqyly biýdjet qarajaty aýdarylǵan. Nátijesinde memleketke 430 mln teńgeden astam shyǵyn keltirilgen.
Budan bólek, agroónerkásipti qoldaý aiasynda bólingen investitsiialyq sýbsidiialardy zańsyz alý derekteri de tirkelgen. Aýyl sharýashylyǵy kooperativteri arqyly berilgen ótinimder negizinde 327 mln teńgeden astam qarajat aýdarylǵanymen, onyń tek shamamen 20%-y ǵana maqsatty túrde jumsalǵan. Qalǵan 250 mln teńgeden astam qarjy qolma-qol aqshaǵa ainaldyrylyp, maqsatsyz paidalanylǵan.
Sot sanktsiiasymen jalpy aýdany 108 gektar bolatyn, quny 1 mlrd teńgeden asatyn jer telimderine tyiym salyndy. Kúdikti J.D. Omarov qamaýǵa alynyp, qylmystyq is sotqa joldandy.
Aita keteiik, osy is aiasynda buǵan deiin Qordyń burynǵy basqarýshy direktory M.K. Iskakov pen «Green Mart Kazakhstan» JShS basshysy R.B. Sazynbek 4 avtokólik tárkilenip, 8 jylǵa bas bostandyǵynan aiyrylǵan.
