Shymkentte alǵash ret daǵdarys ortalyǵy ashyldy. Bul ortalyq Qazaqstan Respýblikasy bas prokýratýrasynyń “Otbasyndaǵy zorlyq-zombylyqsyz Qazaqstan” pilottyq jobasy aiasynda ashylyp otyr. Ortalyqtyń basty maqsaty – turmystyq zorlyq-zombylyqqa, janjalǵa tosqaýyl qoiý. Munda otbasynda álimjettikke ushyraǵan jandarǵa kómek kórsetiledi.
Bul ortalyqta negizinen turmys tálkegine ushyrap, otbasynda teperish kórgenderge kómek kórsetiledi. Solardyń biri, júikesi juqarǵan myna azamatsha beinekameraǵa júzin kórsetýden bas tartty. Kúieýine, otbasyna degen qorqynysh sezimi áli de seiilmei turǵany seziledi. Kúieýin bylai qoiǵanda óz týǵan baýyrynan zábir kórgen Mariia ortalyqqa eki balasymen pana izdep kelgen.
Mariia: “Men endi shydai almaimyn. Balalarymdy alyp, úiden ketip qaldym. Qansha jyldan beri iship jatyr. Shydap keldim. Uratyny taǵy bar. Daǵdarys ortalyǵynyń ashylǵanyn estip, osynda keldim. Balalaryma jáne maǵan tynyshtyq kerek. Kúndelikti urystan sharshadym.”
Daǵdarys ortalyǵy “Qyzyl ai” qoǵamynyń quramynda ashylyp, “Qorǵaý-Astana” qorynyń áleýmettik jobasy aiasynda júzege asyrylyp otyr. Dál qazir ortalyqta 4 áiel jáne 12 balaǵa kómek kórsetilýde.
Anna Ryl, “Kómek” daǵdarys ortalyǵynyń direktory: “Bul máseleni sheshý úshin tek daǵdarys ortalyǵynyń kúshi jetpeidi. Odan bólek quzyrly organ ókilderiniń, dárigerlerdiń kómegi qajet. Ortalyǵymyz ýaqytsha baspanamen qamtý, zańgerlik keńes berý sekildi qyzmet túrlerin usynady. Barlyǵy tegin.”
Jańadan ashylǵan ortalyqta zańger, dáriger, áleýmettik qyzmetkerler, psihologtar jumys isteidi. Odan bólek jatyn bólmeler, balalarǵa arnalǵan alańshalar men ashanalar da qarastyrylǵan.
Qalshagúl Esmurzaeva, “Kómek” daǵdarys ortalyǵynyń psihology: “Analarǵa kómek kórsetemiz. Birinshiden, psihologiialyq, odan keiin áleýmettik kómek kórsetemiz. Eńbekke baýlimyz, bizdiń maqsatymyz – analardy óz aiaqtarynan turǵyzyp, bolashaqta óziniń otbasyna baryp, jarasý maqsatynda jumys istep jatyrmyz.”
Bul daǵdarys ortalyǵynan bólek Shymkentte búgin taǵy eki ortalyq óz jumysyn bastady. Olar – áleýmettik-psihologiialyq súiemeldeý jáne meditsinalyq-psihologiialyq ońaltý ortalyǵy.
