QR Táýelsizdiginiń 30 jyldyǵyna orai Shymkent qalasynda «Alash arystary» eskertkishiniń saltanaty ashylý rásimi ótti, dep habarlaidy QazAqparat.
Kompozitsiialyq músin Shymkent qalasynyń ortalyq saiabaǵy aýmaǵynda ornalasqan. Tuǵyr granitpen qaptalǵan. Músinderdiń biiktigi - ortasha eseppen 210 sm. Tuǵyrdyń uzyndyǵy - shamamen alty metr, eni - úsh metrge jýyq.
Jiynǵa qala ákimi Murat Áitenov, máslihat hatshysy Bahadyr Narymbetov, qalalyq ardagerler keńesiniń tóraǵasy Kenjehan Tólebaev, «Alash arystary» eskertkishiniń ideia avtory Beket Turǵaraev, halyqaralyq «Alash» syilyǵynyń iegeri Marhabat Baiǵut, kórnekti aqyn Hanbibi Esenqaraqyzy jáne taǵy basqa ziialy qaýym ókilderi qatysty.
Qala ákimi kópshilikti eskertkishtiń ashylýymen quttyqtap, is-sharanyń mańyzdylyǵyna toqtaldy.
«Ýaqyt ozǵan saiyn ult azattyǵy úshin aianbai kúresken Alash qairatkerleriniń danalyǵyn, daralyǵyn, kemeńgerligin aiqyn sezinip kelemiz. Olardyń ómir joly biz úshin, bolashaq urpaq úshin – taǵylym alar tárbie. Mundai keshender – jastarymyzdy otanshyldyqqa tárbielep, óz eline, jerine, ótkeni men bolashaǵyna degen syi-qurmetti qalyptastyrý quraly dep bilemiz, - dedi Murat Áitenov.
Jiynalǵandar kompozitsiialyq músinge gúl shoqtaryn qoidy.
