Ońtústik Qazaqstan oblysynda «EKSPO-2017» halyqaralyq mamandandyrylǵan kórmesindegi Afrika elderiniń kórme-jármeńkesi ashyldy. Shymkent qalasynyń «Kórme» ortalyǵynda 10-shy qazanǵa deiin ótetin shara eki el arasyndaǵy týrizmdi damytý, investitsiialyq múmkindikterge jol ashý, iskerlik qatynastardy jaqsartý maqsatynda oblys ákimdiginiń qoldaýymen uiymdastyrylyp otyr.
Kórmeniń ashylý saltanatyna qatysqan Ońtústik Qazaqstan oblysynyń ákimi J.Túimebaev Afrika eli qonaqtaryna qosh keldińizder dei otyryp, olardyń alyp kelgen ónimderin tamashalady.
«Halyqaralyq kórmede qanshama elder óz mádenietterin, ulttyq ózindik erekshelikterin tanytyp ózderiniń ekonomikalyq jáne tehnologiialyq damý deńgeiler men jetistikterin kórsetti. Búgingi kúni Ońtústik óńirine sol kórmeniń bir bóligin alyp kelip otyrǵan Afrika eline úlken alǵysymdy bildiremin. Búgingi kórmeniń ótý maqsaty, týrizmdi damytý, múmkindikterge jol ashý, biznestik bailanystardy jetildirý»,-dedi ákim.
Kórmede Afrika qurlyǵynan kelgen birneshe respýblika óz ónimderin kópshilik nazaryna usynyp otyr. Olar 20-dan astam kompaniialar men Efiopiia, Keniia, Tanzaniia, Gvineia, Gambiia, Sýdan jáne Iemen elderiniń qolóner sheberleri. Afrikalyqtar jańa tehnologiialarmen qatar, kópshilikke kóterińki kóńil-kúi de syilai bildi.
Kórmedegi Afrika bazarynan qolóner buiymdaryn satyp alý múmkindikteri bar. Olardyń shai, kofe jáne qoltyraýyn, piton terisinen jasalǵan sómkeleri men kiim-keshekteri úlken suranysqa ie.
Osy aralyqta Afrika elderinen kelgen qonaqtar óz salt-dástúrlerin kórsetip, tanystyratyn bolady. Sonymen qatar kontserttik baǵdarlamalar jáne eki el arasynda qoiylymdar usynylady.
