Shymkent qalalyq PD baspasóz hatshysy Móldir Bekeeva ózine qol jumsamaq bolǵan, - dep habarlaidy Tengrinews.kz.
5 sáýirde Móldir Bekeeva Facebook-paraqshasynda qoshtasý jazbasyn qaldyrǵan. Jazbada ol mundai qadamǵa qalalyq PD basshylyǵynyń qysymy itermelegenin aitqan. Onyń aitýynsha, oǵan Shymkent qalalyq PD-nyń jańa basshysy Qairat Dálbekov jýrnalisterdi "tamaqtandyrýdy" usynǵan kórinedi. Bekeevanyń aitýynsha, budan bas tartqannan keiin onyń ústinen qylmystyq is qozǵalǵan. Ol bulai ómir súre almaitynyn aityp, otbasymen, dostarymen jáne áriptesterimen qoshtasqan.
Keiin bul jaǵdaiǵa qatysty Shymkent qalalyq PD Ózindik qaýipsizdik basqarmasy pikir bildirdi. Vedomstvo málimetinshe, Móldir Bekeevaǵa qatysty sotaldy tergeý Qylmystyq kodekstiń 378-baby "Bilik ókilin qorlaý" boiynsha júrgizilip jatyr.
"Naýryzdyń aiaǵynda Youtube-te Politsiia departamenti baspasóz qyzmetiniń basshysy (Móldir Bekeeva - esk.) politsiia qyzmetkerine balaǵat sózder aitty degen jazba paida boldy. Osyǵan bailanysty Shymkent qalalyq PD basshysy ishki tekseris taǵaiyndady. Nátijesinde, Ózindik qaýipsizdik basqarmasynyń qyzmetkerleri baspasóz qyzmeti basshysymen áńgimesin jazyp alǵan politseidi anyqtady. Qyzmetker qart ata-anasynyń jalǵyz asyraýshysy bolǵandyqtan, jumysyn saqtap qalý úshin byltyr jeltoqsanda osy áńgimeni jazyp alǵanyn túsindirdi.
Shtabtyń Jedel basqarý ortalyǵynyń ofitseri jáne mamany bola tura, ol burynǵy PD basshysynyń buiryǵy boiynsha baspasóz hatshysynyń qolbasshylyǵyna jiberilgen. Al ol (baspasóz hatshysy - esk.) óz kezeginde, ony kúnde keleńsizdikke ushyratyp, balaǵattap, ar-namysy men qadir-qasietin qorlaǵan. Bul rette Bekeeva ony jumystan shyǵaramyz dep qorqytqan. Keiin ol bul jazbany WhatsApp jelisinde bólisken, al ózi moraldyq jáne psihologiialyq qysymǵa tótep bere almai, aýrýhanaǵa tústi", - delingen Ózindik qaýipsizdik basqarmasy habarlamasynda.
Bul politseidiń sózin baspasóz qyzmeti men kadr jumysy, sondai-aq bes júrgizýshi qoldap, rastaǵany atap ótildi. Olardyń bári Bekeeva PD baspasóz qyzmetin basqarǵan 10 ai ishinde jumys istegeni belgili boldy.
"Sodan keiin Jedel basqarý ortalyǵynyń qyzmetkeri qylmystyq is qozǵaý týraly hattama toltyrdy. Onyń habarlamasy QR Qylmystyq kodeksiniń 378-baby "Bilik ókilin qorlaý" boiynsha tirkeldi. Ótinish boiynsha sotaldy tergeýdi anyqtaý bólimi júrgizedi. Al Qarataý aýdandyq politsiia bóliminde ózine qol jumsaý deregi boiynsha QR Qylmystyq kodeksiniń 105-baby boiynsha sotaly tergeý bastaldy", - delingen habarlamada.
Vedomstvo málimetinshe, qazir Móldir Bekeeva aýrýhanada jatyr.
