Bilim jáne ǵylym ministri Ashat Aimaǵambetov Shymkentke jumys sapary barysynda bilim berý uiymdarynyń pedagogterimen jáne oqytýshylarymen kezdesti, dep habarlaidy "Ult aqparat".
Ministrlikten málim etkendei, A.Aimaǵambetov megapolistegi №1 mektep-gimnaziiada, Jol-kólik kolledjinde, M.Áýezov atyndaǵy Ońtústik Qazaqstan ýniversiteti men Ońtústik Qazaqstan memlekettik pedagogikalyq ýniversitetinde bolyp qaitty.
Kezdesý barysynda muǵalimder men mektep direktorlary, kolledj oqytýshylary, joǵary oqý oryndarynyń professorlyq-oqytýshylyq quramy ministrge óz suraqtaryn qoiǵan. Atap aitqanda, pedagogter mektep direktorlaryn taǵaiyndaýǵa, rotatsiia institýtyn engizýge qatysty usynystaryn bildirdi. Sondai-aq muǵalimderdi jumysqa konkýrs arqyly qabyldaý, oqýlyqtardy ázirleý barysynda qoiylatyn talaptardy zańnamalyq deńgeide kúsheitý qajettigi aityldy.
Joǵary bilim berý sapasyn arttyrý máseleleri de nazardan tys qalmaǵan.
«Ashat Aimaǵambetov pedagogter men oqytýshylarǵa ministrlik atqaryp jatqan negizgi jumystar boiynsha aqparat berdi. Sondai-aq Memleket basshysy mindettegen tapsyrmalardyń oryndalýy týraly keńinen toqtalyp, qabyldanǵan jańa normativtik-quqyqtyq aktiler men bilim berý máseleleri boiynsha zańnamadaǵy ózgerister týraly aitty.
BǴM basshysy kolledjderdiń akademiialyq erkindigi, pedagogterdiń quqyqtaryn qorǵaý jáne olardy mindetine qatysy joq jumystarǵa tartýǵa jol bermeý máselelerine jeke toqtalyp ótti», - dedi vedomstvodan.
