Shyǵys Qazaqstan oblysynda 32 jylqy urlaǵan barymtashy ustaldy, dep habarlaidy "Ult aqparat".
ShQO politsiia departamenti baspasóz qyzmetiniń málimetine súiensek, Semeide politsiiaǵa aryz túsirgen sharýa qojalyǵynyń iesi erkin jaiylymnan 15 bas jylqysynyń joǵalǵanyn jetkizdi. Osynyń saldarynan oǵan 3 million teńgeden astam materialdyq zalal keltirilgen.
Atalǵan fakti QR Qylmystyq kodeksiniń 188-baby 2-bóliginiń 1-tarmaǵy boiynsha sotqa deiingi tergeýdiń biryńǵai tizilimine engizilip, tártip saqshylary birden jedel-izdestirý sharalaryna kiristi.
Jedel ýákilder ýchaskelik inspektorlarmen birge jaqyn mańdaǵy barlyq aýmaqtardy aralap, kýágerlerden jaýap aldy, mal tasymaldaityn avtokólikterdi jáne et pen mal satatyn oryndardy muqiiat teksergen.
«Politsiia qyzmetkerleri qysqa merzimde mal urlyǵyna qatysty kúdiktini ustady. 47 jastaǵy jergilikti turǵyn óz kinásin tolyqtai moiyndaǵan. Tergeý barysynda ótken jyldyń aiaǵynan bastap osy ýaqytqa deiin er adamnyń atalǵan sharýa qojalyǵy aýmaǵynan 32 bas jylqy urlaǵany belgili boldy», - dedi ShQO PD bastyǵy Saǵat Mádiev.
Kúdikti ýaqytsha ustaý izoliatoryna qamaldy. Qazirgi ýaqytta sotqa deiingi tergeý amaldary júrgizilýde.
Sonymen qatar urlanǵan jylqylardy satyp alǵan adam anyqtaldy. 52 jastaǵy qala turǵyny 12 bas jylqyny alyp, onyń 11 basyn basqaǵa satyp jibergen.
