Shyǵys Qazaqstan oblysynda qutqarýshylar, ormanshylar men shekarashylar 15 gektar aýmaqqa jaiylǵan qyzyl jalyndy sóndirdi, dep habarlaidy "Ult aqparat".
ShQO tótenshe jaǵdailar departamenti baspasóz qyzmetiniń málimetine súiensek, 13 mamyrda saǵat 14.40-ta Zaisan aýdanyndaǵy «Qaratal Qumy» ýchaskesinde shóp órtengen.
Oqiǵa ornyna órt sóndirý bólimsheleri men orman sharýashylyǵynyń qyzmetkerleri jedel jetti.
«Tilsiz jaýdyń jalpy aýmaǵy 15 gektardy quraǵan. Órtti sóndirýge barlyǵy TJD-nyń 15 qutqarýshysy men 3 tehnikasy, orman sharýashylyǵynan 12 adam, 2 tehnika jáne Zaisan shekara zastavasynan 70 sarbaz jumyldyryldy» dep habarlady vedomstvo ókilderi.
Osy rette departament mamandary óńir jurtshylyǵyna ystyq jáne jeldi aýa-raiynda ot jaǵýǵa tyiym salynǵandyǵyn eskertedi.
Eger órt shyǵyp jatsa, dereý «101» nemese «112» nómirine habarlasý qajet.
