Dúisenbi kúni Shyǵys Ierýsalimde bolǵan politsiiamen qaqtyǵys kezinde 300-den astam adam jaralandy. Ál-Aqsa meshiti mańyndaǵy tártipsizdik kezinde jaralanǵan 230 adam aýrýhanaǵa jetkizildi, jeteýiniń háli múshkil. Bul týraly Associated Press agenttigi jazdy.
Livandyq Al Mayadeen telearnasy dúisenbi kúni keshke qarai qaqtyǵystyń toqtaǵanyn habarlady.
AP-diń jazýynsha, politsiia kózden jas aǵyzatyn gaz ben qulaq tundyratyn granata qoldanǵan. Ierýsalim biligi tártipsizdikke bailanysty Hram taýyna baratyn joldy japqan.
Jyl saiyn 10 mamyrda Ierýsalim kúni atap ótiledi: bul kún 1967 jylǵy Alty kúndik soǵystan keiin Shyǵys Ierýsalimniń Izrail qaramaǵyna ótýine orai belgilengen. Biyl bul kún musylmandar úshin qasietti ai sanalatyn Ramazan aiymen tuspa-tus keldi.
Izrail qorǵanys armiiasynyń baspasóz qyzmeti Týitterde HAMAS tobynyń Izrail aýmaǵyna qarai úsh zymyran ushyrǵanyn habarlady. Buǵan jaýap retinde Izrail HAMAS nysandaryn atqylaǵan. Bul týraly "Niýsrý.kom" portaly habarlady.
Osyǵan deiin AQSh prezidentiniń ulttyq qaýipsizdik jónindegi keńesshisi Djeik Sallivan izraildik áriptesi Meir Besh-Shabatpen telefon arqyly áńgimelesip, Ierýsalimdegi ahýalǵa alańdaǵan.
