Foto: Senat baspasóz qyzmeti
Elimizde shyǵarmashylyq sýbektileri endi biryńǵai salyqty ǵana tóleidi. Bul týraly Mádeniet jáne aqparat ministri Aida Balaeva Facebook paraqshasynda jazdy.
«Memleket basshysynyń kreativti indýstriiany damytý jónindegi tapsyrmasyn oryndaý maqsatynda Ulttyq ekonomika jáne Qarjy ministrlikterimen birge keshendi jumys júrgizdik. Negizgi maqsatymyz shyǵarmashylyq sýbektilerine salyqty jeńildetý bolatyn.
Osy keshendi jumystyń nátijesinde Úkimet (QR ÚQ #1240 29.12.2023j.) qaýly qabyldady. Qaýlyǵa sáikes 40 qyzmet túri arnaiy bólshek salyq rejimine ótti. Bul degenimiz biznes KTS, jeke tabys salyǵy, QQS tóleýden bosatylǵanyn bildiredi. Atalǵan qyzmet túrlerimen ainalysatyn sýbektiler endi biryńǵai salyqty ǵana tóleidi. Bul jeke kásipkerler úshin 2 paiyzdan 4 paiyzǵa deiin, JShS úshin 8 paiyzǵa deiin bolady. Tek kompaniianyń jyldyq ainalymy 2,2 milliard teńgeden aspaýy, al shtatta 200 adamnan kóp bolmaýy qajet», — dedi ministr.
Onyń atap ótýinshe, salyqty jeńildetý kino, beinekontent pen telebaǵdarlamalardy óndirýge jáne odan keiingi óndiriske, mýzykalyq shyǵarmalarǵa dybys jazý men basyp shyǵarýǵa, teatr jáne mýzei ónerine, sáýlet jáne dizainǵa, qolóner buiymdaryna, halyq shyǵarmashylyǵyna jáne kádesyilar óndirisine áser etedi.
«Osy qoldaý sharasyn ázirleý barysynda halyqaralyq tájiribeni muqiiat taldaǵanymyzdy atap ótkim keledi. Eń ozyq elderdiń (Ulybritaniia, Germaniia, Ońtústik Koreia) tájiribesi kreativti indýstriiany damytý úshin salyqty jeńildetýge erekshe mán berý kerektigin kórsetedi. Atalǵan jumys salany aýqymdy damytýǵa baǵyttalǵan alǵashqy qadamdardyń biri. Bul osy saladaǵy igilikti bastamalardyń biri dep bilemiz», — dep atap ótedi Aida Balaeva.
