Jeksenbi, 7 naýryz kúni Shveitsariiada qoǵamdyq orynda kisiniń júzin jasyratyn kiimmen júrýdi tyiý jóninde daýys berip jatyr. Elde bar-joǵy otyz shaqty áiel ǵana betin oramalmen búrkemeleidi.
Bastama qoldaý taýyp, zań ózgerse, narazylyq aktsiialarynda da betti jaýyp júrýge tyiym salynady. Biraq osy referendýmnyń ótýine uiytqy bolǵan naýqan bastamanyń nika nemese býrka sekildi musylman áielderdiń kiimine baǵyttalǵanyn kórsetti. Ádette mundai kiimdi konservativti ustanymdaǵy musylmandar kiedi.
Erekshe jaǵdailar da qarastyrylǵan. Dini joralǵylar men dástúrli karnavaldar kezinde ruqsat etiledi. Sondai-aq densaýlyq jaǵdaiy da eskeriledi. Shveitsariiada qazir koronavirýs indetine bailanysty maska taǵý mindetti.
Ońshyl partiialar kóshelerge betin qara oramalmen japqan áieldiń beinesin ornatyp, daýys berýshilerdi "ekstremizmdi toqtatý" sharalaryn qoldaýǵa shaqyryp otyr.
Másele din erkindigi, qaýipsizdik, ekonomika jáne áiel quqyqtary jónindegi pikirtalastardyń toǵysynda tur.
Bul sharaǵa qarsylyq bildirgen Shveitsariia úkimeti betin jaýyp júretinniń kóbi týrist ekenin, zańnyń Parsy shyǵanaǵyndaǵy baqýatty týrister men kásipkerlerdi úrkitýi múmkin ekenin aitady.
Bastamany synap otyrǵandar zańnyń dini quqyqtardy buzyp, musylmandardy stigmalaitynyn aitady. Basqalary mundai zańnyń qajet emes, óitkeni elde bar-joǵy otyz shaqty musylman áiel ǵana betin jabady deidi.
Shveitsariia kantondarynyń biri Sankt-Gallende býrka kiiý osyǵan deiin-aq tyiym salynǵan. Jergilikti politsiia zań iske qosylǵan eki jyldyń ishinde eshqandai máselege tap bolmaǵanyn aitady.
Sharanyń jaqtastary zań áielder quqyǵyn qorǵap, áielderdiń qoǵamǵa integratsiialanýyna yqpal etedi deidi.
Munyń aldynda qoǵamdyq orynda býrka kiiýdi Frantsiia, Belgiia jáne Avstriia elderi tyiǵan. Avstriiada politsiia oramal taqqan áielderge harassment jasaǵan birneshe jaǵdai tirkeldi.
8,6 million halqy bar Shveitsariiadaǵy tike demokratiia júiesi aiasynda referendýmdar men búkilhalyqtyń daýys berý birneshe ai saiyn ótip turady.
Daýys berýge kez kelgen 100 myń adamnyń qoldaýyn tapqan kez kelgen máseleni kirgizýge bolady.
Shveitsariialyqtar munymen qatar elektrondy sáikestendirý kýáligin engizý jáne Indoneziiamen saýda kelisimi jóninde daýys beredi.
