Ózbekstannyń birinshi prezidenti Islam Karimovtyń qyzy Gúlnara Karimova Shveitsariia sotynda jeńdi. Bloomberg agenttiginiń jazýynsha, sonyń arqasynda burynǵy prezidenttiń qyzy buǵattalǵan 350 mln dollaryn qaitaryp alýy múmkin.
3 jeltoqsanda Shveitsariia federaldyq apelliatsiialyq soty Gúlnara Karimovanyń Gibraltarda tirkelgen Takilant Ltd kompaniiasynyń zańdy benefitsiary ekenin rastaǵan. Bul kompaniianyń Shveitsariia bankindegi esepshoty 2018 jyly qozǵalǵan qylmystyq is aiasynda buǵattalǵan edi.
"Bul - Gúlnara Karimova úshin mańyzdy jeńis. Federaldyq prokýratýra onyń aktivterin tárkilep, osy protseste negizgi quqyqtarynan aiyrýǵa tyrysty" dedi shveitsariialyq advokaty Gregýr Manja.
Qylmystyq is boiynsha Ózbekstannyń B. esimdi azamaty "aqsha jymqyrý maqsatynda" Gúlnara Karimovanyń atynan jalǵan qujat jasatyp, birqatar kompaniia tirkedi dep tanylǵan.
Biyl qyrkúiek aiynda Shveitsariia Ózbekstanmen kelisimge qol qoiyp, 2012 jyldan beri Karimovanyń Shveitsariia bankinde qalyp qoiǵan 131 mln dollaryn qaitaratynyn málimdegen.
Kelisim talaptaryna sáikes, Tashkent qaitarylǵan aqshany qalai jumsaǵanyn ashyq jariialap, esep berip otyrýy tiis. Bilik bul qarajatty "halyqtyń jaǵdaiyn jaqsartatyn", eldiń turaqty damýyn qamtamasyz etetin jobalarǵa jumsaýy qajet.
Gúlnara Karimovanyń ústinen qozǵalǵan qylmystyq is aiasynda taǵy 715 million dollar buǵattaýly kúide qalǵan. Bul qarjy da aldyńǵy shartpen Ózbekstanǵa qaitarylýy múmkin. Qańtar aiynda Ózbekstan bas prokýratýrasy Karimova isi aiasynda Shveitsariiaǵa 70 óner týyndysyn qaitaratynyn málimdegen.
Ózbekstanda Karimovanyń ústinen "aqsha jymqyrý" jáne "bopsalaý" baptary boiynsha úsh ret qylmystyq is qozǵalyp, úsheýinde de burynǵy prezidenttiń qyzy kináli dep tanylǵan.
Ózbekstannyń birinshi prezidenti Islam Karimov qaitys bolǵannan keiin 2017 jyly qyzy Gúlnara Karimova Ózbekstanda 10 jylǵa bas bostandyǵynan aiyrylǵan bolatyn. Oǵan "salyqtan jaltardy", "qarjy jymqyrdy", "bopsalady", "ofshor kompaniiasynyń qujattaryn joidy" degep aiyp taǵyldy. AQSh pen Eýrodaqtyń birneshe eli Karimovany qarjy jymqyrdy dep aiyptaǵannan keiin Ózbekstanda eks-prezidenttiń qyzynyń ústinen is qozǵalǵan.
Karimovaǵa alǵash ret sot úkimi shyqqannan keiin ol biraz ýaqyt úiqamaqta otyrdy. Biraq 2019 jyly naýryzda "úiqamaq erejesin buzdy" dep aiyptalyp, Tashkent oblysyndaǵy túrmege jiberildi. Karimova men onyń qyzy bul aiyptardy joqqa shyǵardy. Osydan soń Karimovanyń ústinen taǵy qylmystyq is qozǵalǵan.
Sońǵy is boiynsha Karimova 13 jyl 4 aiǵa bas bostandyǵynan aiyrylǵan.
Biyl mamyr aiynda Frantsiia Ózbekstanǵa Karimovanyń 10 million dollaryn qaitarǵan. Bul qarajat Ózbekstannyń memlekettik biýdjetine aýdarylǵan jáne jalpy maqsatta jumsalyp jatyr.
Ózbekstan biligi aktivti qaitarý boiynsha Shveitsariia, AQSh, Frantsiia, Resei Federatsiiasy jáne ózge elderdiń quzyrly organdarymen jumys istep jatyr. Aqparat boiynsha, másele Karimovanyń 1,3 milliard dollar aktivi jaily bolyp otyr.
Qazirgi kezde Gúlnara Karimova Tashkent oblysyna qarasty Zangiat aýdanyndaǵy áielder koloniiasynda jazasyn ótep jatyr.
