Svealandtyń apelliatsiialyq soty Anatol jáne Gabriel Statige qarsy is boiynsha Qazaqstan tarapy – Qazaqstan Ulttyq Bankiniń jáne Ádilet ministrligi atynan Qazaqstan Respýblikasynyń paidasyna sheshim qabyldady, dep habarlaidy "ULt aqparat" QR Ulttyq Bankiniń baspasóz qyzmetine silteme jasap.
Shved sottarynda isti qaraý 2018 jyldan bastap jalǵasty. Sotqa edáýir dáleldemeler men dálelder, onyń ishinde Ulttyq Bank tóraǵasynyń orynbasary Áliia Moldabekovanyń kýágerlik aiǵaqtary, sondai-aq Angliia, Shved jáne Qazaqstan quqyǵy boiynsha sarapshylardyń qorytyndylary usynyldy. Protseske qatysý úshin «Frank Advokatbyra» áigili zań firmasy tartyldy. Protsess barysynda Qazaqstan Ulttyq Banki Stati dálelderiniń negizsizdigin dáleldedi jáne aktivter BUU 2004 jylǵy 2 jeltoqsandaǵy Konventsiiasynda bekitilgen halyqaralyq quqyq qaǵidattaryna sáikes absoliýtti immýnitetpen qorǵalǵanyn rastady. Budan basqa, Shved soty Statidi Ulttyq Bankke jáne Qazaqstan Respýblikasyna tolyq kólemde sot shyǵystaryn óteýge mindettedi. Mundai sheshimder Skandinaviia memleketiniń sot praktikasynda óte sirek shyǵarylatyn bolyp esepteledi. Shved sotynyń sheshimi Ulttyq qordyń aktivterinen 83 mln dollarǵa jýyq somada tyiymdy alyp tastaýǵa múmkindik beredi jáne Statidiń Qazaqstan Respýblikasyna qarsy alqalyq sheshimdi oryndatýǵa ákelý múmkindikterimen bailanysty uzaqqa sozylǵan sotta isti qaraý júiesindegi mańyzdy bólim bolyp tabylady.
Budan buryn Angliia soty Stati tarapynan alqalyq sheshimdi alý kezinde alaiaqtyq belgilerin anyqtady. Buǵan qaramastan, Stati 2017 jyly Ulttyq qordyń aktivterine tyiym salýǵa qol jetkizgen. 2020 jylǵy 22 sáýirde Angliianyń Joǵary soty Statidiń dálelderin joqqa shyǵaryp jáne Ulttyq Banktiń BNYM kastodianynda Ulttyq Bank aldynda ǵana Ulttyq qor aktivterine qatysty mindettemeleri bar ekendigi týraly dálelderimen kelisip, Qazaqstan tarapynyń paidasyna da sheshim shyǵarǵanyn eske salamyz. Ulttyq Bank sheteldik iýrisdiktsiialarda óz quqyqtary men múddelerin qorǵaýdy jalǵastyrýda jáne Statiden keltirilgen ziiandy ótetýge qol jetkizýge nietti.
