QR Ulttyq ekonomika ministri Áset Erǵaliev ekonomikalyq jaǵdai nasharlaǵan jaǵdaiǵa rezervtik jospar ázirlengenin aitty, dep habarlaidy QazAqparat.
«Koronavirýs pandemiiasy qansha ýaqytqa jalǵasatyny belgisiz, sondai-aq bul daǵdarys aiaqtalǵannan keiin ekonomika qanshalyqty jyldam qalpyna keletinin bilmeimiz. Qandai da bir jańa teris faktorlar bola ma? Partiia Tóraǵasy jáne Memleket basshysy únemi B plany bolýy kerektigin aityp keledi. Qosymsha syn-qaterlerge tap bolsaq, sizderde rezervtik is-qimyl jospary bar ma?», - dep surady Májilis tóraǵasy Nurlan Nyǵmatýlin «Nur Otan» partiiasy parlamenttik fraktsiiasynyń keńeitilgen otyrysynda.
Óz kezeginde ministr Áset Erǵaliev mundai jospar bar ekenin jetkizdi.
«Úkimet Ulttyq bankpen jáne Qarjy naryǵyn retteý jáne damytý agenttigimen birlese áleýmettik ekonomikalyq ahýal nasharlaǵan jaǵdaiǵa birlesken is-qimyl josparyn ázirledi. Ol kontrtsikldik sipattaǵy shuǵyl qadamdardy qamtyp otyr. Sondai-aq halyq pen biznesti qoldaýǵa, makroekonomikalyq turaqtylyqty qamtamasyz etýge baǵyttalǵan», - dedi Ulttyq ekonomika ministri.
Budan buryn habarlanǵandai, QR Premer-Ministriniń birinshi orynbasary Álihan Smaiylov biýjettiń kiris bóligin ulǵaitý jumystary qalai júretinin aitty.
«Biyl ekonomikany qoldaý úshin tiisti sharalar qabyldaý qajettigi týyndaýy múmkin. Sebebi koronavirýsqa bailanysty shekteý qadamdary jalǵasyp keledi. Sonymen birge Úkimettiń aldynda «Nur Otan» partiiasynyń sailaýaldy baǵdarlamasyn iske asyrý mindeti tur. Ol úshin qosymsha qarjylandyrý kerek. Aldymyzdaǵy bes jyldyń ishinde baǵdarlamany júzege asyrý úshin 21 trln teńge qajet. Bul turǵyda biýjettiń kiris bóligin ulǵaitý jumystary júrgiziledi. Negizinen salyq, kedendik ákimshilendirýdi ary qarai tsiflandyrý jumystary, sondai-aq «kóleńkeli» ekonomikany qysqartý boiynsha arnaiy keshendi jospardy iske asyrý esebinen bolady», - dep túsindirdi Smaiylov.
