Jambyl oblysynda apatqa ushyraǵan poiyzdyń mashinisi ustalǵan joq. Bul týraly búgin ishki ister ministri Qalmuhanbet Qasymov málimdedi, dep habarlaidy Sputnik Qazaqstan tilshisi.
Buǵan deiin "KTK" telearnasy Astana-Almaty baǵytyndaǵy poiyzdy basqarǵan mashinistiń ustalǵanyn habarlaǵan edi. BAQ aqparatynsha, jolaýshylar vagony aýdarylǵan ýchaskede kezekshilik atqarǵan temirjol jumysshylarynan da jaýap alynǵan.
"Ony ustady dep kim aitty? Bul jalǵan aqparat, odan bar bolǵany jaýap alynyp, keiin bosatty. Bul degen tutas bir qylmystyq is, saraptama júrgiziledi", — dedi Qasymov úkimet otyrysynan keiin.
Mashinistiń ustalmaǵanyn birinshi investitsiialar jáne damý ministri Roman Skliar de rastady.
"Joq, eshkimdi ustaǵan joq. Tergeý obektivti, ashyq túrde júrgiziledi", — dep sendirdi Skliar.
Eske salyp ótsek, 17 maýsymda saǵat 13.25-te Jambyl oblysynyń Shý aýdanynda Astana-Almaty baǵytyndaǵy jolaýshylar poiyzynyń 8 vagony relsten shyǵyp ketti. Poiyzda barlyǵy 829 jolaýshy bolǵan, tótenshe jaǵdai saldarynan bir bala qaza tapty. 25 adam meditsinalyq kómekke júgingen.
