Jambyl oblysy Shý qalasy mańynda bolǵan apat ornynda qaita qalpyna keltirý jumystary júrip jatyr.
Habar 24 arnasynyń málimetinshe, tańerteńnen arnaiy shtab jumys josparyn taǵy bir pysyqtap, mamandar óz salasy boiynsha iske kiristi. Qazir oqiǵa bolǵan aimaq tolyq oqshaýlanyp, sebep-saldaryn anyqtaý maqsatynda tekserý sharalary bastaldy.
Aýdarylǵan vagondar áli apat ornynda jatyr, olardy áketýge arnaiy tehnika keldi. Apattyń saldaryn joiýǵa, aldyn ala málimet boiynsha, 300-ge tarta adam qatysyp jatyr. Zardap shekken 48 jastaǵy Astana turǵynyna búgin ota jasalady dep josparlanǵan. Kóz jumǵan 12 jastaǵy jasóspirimniń máiiti keshe Qaraǵandyǵa jóneltildi.
"Túni boiy jumys istegenderdi ózge mamandar almastyryp, qosymsha kúshter tartyldy. Qazir qisaiǵan temirjol tósemderin birneshe brigada men ondaǵan tehnika qalpyna keltirip jatyr", – dep jazylǵan apat ornynda jumys istep jatqan tilshiniń habarlamasynda.
Apat aýmaǵynda jolaýshylardyń zattary shashylyp jatyr. Poiyzdy tonap ketpeý úshin kúzet qoiylǵan.
Keshe Jambyl oblysy Shý aýdanynda "Astana-Almaty" jolaýshylar poiyzynyń segiz vagony relsten shyǵyp ketti. Poiyzda 829 jolaýshy kele jatqan. Apat kezinde 12 jasar jasóspirim kóz jumdy. Jambyl oblysynyń densaýlyq saqtaý basqarmasy 14 adam meditsinalyq kómekke júgingenin habarlady. Olardyń ishinde bireýi ǵana aýrýhanaǵa jatqyzylǵan.
