جامبىل وبلىسى شۋ قالاسى ماڭىندا بولعان اپات ورنىندا قايتا قالپىنا كەلتٸرۋ جۇمىستارى جٷرٸپ جاتىر.
حابار 24 ارناسىنىڭ مەلٸمەتٸنشە, تاڭەرتەڭنەن ارنايى شتاب جۇمىس جوسپارىن تاعى بٸر پىسىقتاپ, ماماندار ٶز سالاسى بويىنشا ٸسكە كٸرٸستٸ. قازٸر وقيعا بولعان ايماق تولىق وقشاۋلانىپ, سەبەپ-سالدارىن انىقتاۋ ماقساتىندا تەكسەرۋ شارالارى باستالدى.
اۋدارىلعان ۆاگوندار ەلٸ اپات ورنىندا جاتىر, ولاردى ەكەتۋگە ارنايى تەحنيكا كەلدٸ. اپاتتىڭ سالدارىن جويۋعا, الدىن الا مەلٸمەت بويىنشا, 300-گە تارتا ادام قاتىسىپ جاتىر. زارداپ شەككەن 48 جاستاعى استانا تۇرعىنىنا بٷگٸن وتا جاسالادى دەپ جوسپارلانعان. كٶز جۇمعان 12 جاستاعى جاسٶسپٸرٸمنٸڭ مەيٸتٸ كەشە قاراعاندىعا جٶنەلتٸلدٸ.
"تٷنٸ بويى جۇمىس ٸستەگەندەردٸ ٶزگە ماماندار الماستىرىپ, قوسىمشا كٷشتەر تارتىلدى. قازٸر قيسايعان تەمٸرجول تٶسەمدەرٸن بٸرنەشە بريگادا مەن ونداعان تەحنيكا قالپىنا كەلتٸرٸپ جاتىر", – دەپ جازىلعان اپات ورنىندا جۇمىس ٸستەپ جاتقان تٸلشٸنٸڭ حابارلاماسىندا.
اپات اۋماعىندا جولاۋشىلاردىڭ زاتتارى شاشىلىپ جاتىر. پويىزدى توناپ كەتپەۋ ٷشٸن كٷزەت قويىلعان.
كەشە جامبىل وبلىسى شۋ اۋدانىندا "استانا-الماتى" جولاۋشىلار پويىزىنىڭ سەگٸز ۆاگونى رەلستەن شىعىپ كەتتٸ. پويىزدا 829 جولاۋشى كەلە جاتقان. اپات كەزٸندە 12 جاسار جاسٶسپٸرٸم كٶز جۇمدى. جامبىل وبلىسىنىڭ دەنساۋلىق ساقتاۋ باسقارماسى 14 ادام مەديتسينالىق كٶمەككە جٷگٸنگەنٸن حابارلادى. ولاردىڭ ٸشٸندە بٸرەۋٸ عانا اۋرۋحاناعا جاتقىزىلعان.
