Shýda jantúrshigerlik jol apaty bolyp, bir adam kóz jumdy, dep habarlaidy "Ult aqparat" Polisia.kz portalyna silteme jasap.
"9 qyrkúiek túngi saǵat 01:37 shamasynda Shý qalasynda jol-kólik oqiǵasy boldy. Mercedes Benz avtokóliginiń 30 jastaǵy júrgizýshisi Seifýllin kóshesimen úlken jyldamdyqpen kele jatyp, 29 jastaǵy jergilikti turǵynnyń basqarýyndaǵy Volkswagen Golf avtokóliginiń artqy jaǵyna soqtyǵysqan. Qatty soqqy saldarynan órtengen Volkswagen Golf kólik júrgizýshisi VAZ-21150 avtokóliginiń aldyńǵy jaǵyn soqqan. Jol-kólik apaty saldarynan Volkswagen Golf avtokóliginde bolǵan 21 jastaǵy jolaýshy qyz oqiǵa ornynda qaitys bolyp, osy kóliktiń 29 jastaǵy júrgizýshisi men jolaýshysy túrli dene jaraqattarymen Shý qalasynyń ortalyq aýrýhanasyna jetkizildi.
Atalǵan derekke qatysty QR QK 345-babynyń 3-bóligi boiynsha sotqa deiingi tergeý amaldary bastaldy. Sondai-aq birqatar qajetti saraptama taǵaiyndaldy. Mercedes Benz avtokóliginiń júrgizýshisi ýaqytsha ustaý izoliatoryna qamaldy" - delingen habarlamada.
Tergeý sharalaryn júrgizý barysynda atalǵan kóliktiń 30 jastaǵy júrgizýshisi Volkswagen Golf avtokóligimen soqtyǵysqanǵa deiin Mercedes Benz 124 avtokóligimen soqtyǵysqany anyqtaldy. Volkswagen Golf avtokóligimen soqtyǵysqannan keiin Auid 100 avtokóligimen soqtyǵysqan, al bul mashina inertsiia boiynsha jaqyn mańdaǵy Mercedes Benz 124 mashinasyn soqqan.
Atalǵan kólikterdiń barlyǵy turaqqa qoiyldy, kólik salondarynda júrgizýshiler de, jolaýshylar da bolǵan joq. Qazirgi ýaqytta osy oqiǵaǵa qatysty barlyq qajetti tergeý amaldary júrgizilip jatyr.
