Foto: primeminister.kz
Mańǵystaý oblysy Qaraqiia aýdanyndaǵy «jasyl» sýtegi óndiretin zaýyttyń qurylysy aiasynda Germaniianyń Federaldy Prezidenti Frank-Valter Shtainmaier men Qazaqstan Premer-Ministri Álihan Smaiylovtyń qatysýymen burǵylaý jumystaryn iske qosý rásimi ótti, dep habarlaidy "Ult aqparat" Úkimet basshysynyń baspasóz qyzmetine silteme jasap.
Jobany tanymal Svevind nemis kompaniiasy Eýropalyq keńes Prezidenti Sharl Misheldiń ótken jyldyń qazan aiynda Qazaqstanǵa sapary kezinde qol qoiylǵan Investitsiialar týraly kelisim aiasynda júzege asyryp jatyr. Joba boiynsha Mańǵystaýda jalpy qýaty 40 GVt bolatyn kún jáne jel stantsiialaryn salý josparlanyp otyr. Bul jylyna 2 mln tonnaǵa deiin «jasyl» sýtegi nemese 11 mln tonna «jasyl» ammiak óndirýge múmkindik beredi.
Geologiialyq burǵylaý jumystarynyń bastalýy jobany damytýdyń jańa kezeńge kóterilgenin bildiredi – bul jer asty jynystaryn tereńirek taldaý jáne odan keiingi kezeńderdi pysyqtaý úshin mańyzdy málimetter alýǵa jaǵdai jasaidy. Jalpy jobanyń arqasynda Qazaqstan sýtegi nemese ammiaktyń iri kólemin Eýropa jáne Aziia naryqtaryna jetkizý boiynsha múmkindikterin arttyrady, sondai-aq el ekonomikasynyń ekologiialyq taza ádisterge kóshýin jedeldetedi.
Svevind kompaniiasynyń basshysy Volfgang Kropptyń aitýynsha, álemde «jasyl» sýtegin óndirý boiynsha mundai aýqymda birde-bir joba áli júzege asyrylmaǵan.
Sonymen qatar kásiporynǵa túrli jumystar júrgizýge berilgen aýmaqty aralaý kezinde mártebeli qonaqtardyń qatysýymen Genesis konsalting kompaniiasy – frantsiialyq Technip Energies injenerlik-tehnikalyq jáne tehnologiialyq kompaniiasynyń enshiles firmasymen aldyn ala jobalaý-izdestirý jumystaryn (pre FEED) júrgizýge kelisim-shartqa qol qoiyldy. Bul zertteýler mańyzdy tehnologiialyq sheshimder qabyldaýǵa jáne zaýyt qurylysyn egjei-tegjeili josparlaýǵa kómektesedi.
