Shri-Lankada jeksenbi, 21 sáýirde bolǵan birneshe jarylystan qaza tapqandar sany 200-den asty. 500-den astam adam jaralanǵan. Shri-Lanka politsiiasy men dárigerleri bergen sońǵy derek osyndai. Reuters agenttigi 207 adamnyń qaza tapqanyn habarlady.
Sońǵy derek boiynsha, jeksenbi, 21 sáýirde Shri-Lankanyń túrli aýmaǵynda segiz jarylys bolǵan. Onyń tórteýi - qonaq úide, úsheýi - shirkeýde boldy. Taǵy bir jarylys týraly ázirge tolymdy derek joq.
Jarylystyń basym bóligi - Kolombo qalasynda bolǵan. El astanasynyń soltústigine qarai ornalasqan Negombo jáne shyǵys jaǵalaýdaǵy Battikaloa qalasyndaǵy shirkeýler de búlingen.
Bul 10 jyl buryn elde azamattyq soǵys aiaqtalǵaly beri bolyp otyrǵan iri shabýyl. Politsiia dereginshe, qaza tapqandar arasynda keminde 35 shetel azamaty bar. Qazaqstannyń SIM 21 sáýirde keshkisin "aldyn ala derek boiynsha, qaza tapqandar arasynda qazaqstandyqtar joq" dep málimdedi.
Ázirge oqiǵany birde-bir uiym moinyna alǵan joq. Shri-Lanka premer-ministri shabýylǵa qatysy bar bolýy múmkin segiz adamnyń ustalǵanyn habarlady. Olardyń jergilikti turǵyndar ekeni aitylady.
Bilik elde komendanttyq saǵat engizip, áleýmettik jelilerge kirýge shekteý qoiǵan. Shabýyldy álem elderiniń jetekshileri aiyptady. Qazaqstannyń prezidenti Qasym-Jomart Toqaev Shri-Lanka halqy men el basshylyǵyna kóńil aitty.
Sáýirdiń 21-i kúni Shri-Lankada birneshe jarylys bolyp, áýel basta júzden astam adamnyń qaza tapqany habarlanǵan. Keiinirek halyqaralyq agenttikter qaza tapqan azamattardyń 200-den asqanyn habarlady.
