Búgin Sybailas jemqorlyqqa qarsy is-qimyl agenttigi Mádeniet jáne sport ministrligimen «Parasat joly» ortalyqtary arqyly parasattylyq ideologiiasyn ilgeriletý jónindegi birlesken jumys týraly Memorandýmǵa qol qoidy, dep habarlaidy QazAqparat.
«Adamdy adam etken – kitap, sol sebepti «Parasat joly» jobasy osy Ulttyq akademiialyq kitaphanada bastalyp jatyr. Bizdiń maqsatymyz sana-sezimdi ózgertý jáne sybailas jemqorlyq deńgeiin tómendetý. Jemqorlyqty joiý – barshamyzdyń mindetimiz. Qazaqstan búgingi tańda jemqorlyqtan taza memleket qurýǵa kúsh salyp otyr.», - deidi Sybailas jemqorlyqqa qarsy is-qimyl agenttiginiń tóraǵasy Alik Shpekbaev.
Onyń aitýynsha, sybailas jemqorlyqpen kúres basty 4 baǵytta júrgiziledi. Birinshi baǵyt – sybailas jemqorlyqtyń aldyn alý, boldyrmaý jáne joiýda qarastyrady.
«1998 jyly sybailas jemqorlyqpen kúres týraly alǵashqy zań shyqqan. 17 jyldan keiin sybailas jemqorlyqqa qarsy is-qimyl týraly ekinshi zań qabyldandy. Ol zańda sybailas jemqorlyqtyń saldarymen kúres emes, aldyn alý máselesi qaralǵan. Qazirdiń ózinde bizdiń qyzmetimizde úlken ózgerister bolyp jatyr. Sybailas jemqorlyqqa qarsy is-qimyl agenttiginiń 3 departamenti bar. Olar: Preventsiia, Parasattylyq jáne seriktestik departamenti. Ony sheteldegi myqty oqý oryndaryn bitirip kelgen jastar basqaryp otyr. Ekinshi baǵyt – sybailas jemqorlyqqa qarsy mádenietti qalyptastyrý. Bul baǵyt sybailas jemqorlyqqa tózbeýshilikti nasihattaidy», - deidi ol.
Úshinshi baǵyt – belsendi qoǵam, syndarly seriktestik.
«Osy jerde qoǵamdyq, azamattyq baqylaýdy kúsheitý kerek. Memleket basshysy qoǵamdyq baqylaý týraly zańdy qarastyryp jatyr. Ol zań qabyldanýy kerek. Qazir qoǵam da, memleket te ózgerdi. Sońǵy bir jyldyń ishinde biz parlamentke sybailas jemqorlyqqa qarsy úsh paket zańdardy ótkizdik. Sheteldik reiting agenttikteri bizdiń jumysymyzdy kórip, baǵalap otyr. Sońǵy 3-4 jylda olardyń bizdiń elge degen kózqarasy basqasha. Tórtinshi baǵyt – qylmystyq jaýapqa tartý. Sybailas jemqorlyqpen jol bergenderdi ustap, qylmystyq jaýapqa tartyp jatyrmyz.
