QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev baǵynyshty qyzmetkeri sybailas jemqorlyqqa urynǵan sheneýnikterdiń qyzmetin doǵarýǵa ótinish berý sharttaryn atady, dep habarlaidy "Ult aqparat".
«26 qarashada Memleket basshysynyń sybailas jemqorlyqqa qarsy zańnamaǵa jańa tolyqtyrýlar paketine qol qoiǵanyn bilesizder. Eń kóp talqylanǵan máseleniń biri – baǵynyshty qyzmetkeri sybailas jemqorlyq jasaǵan jaǵdaida saiasi qyzmetshiniń qyzmetten ketýi. Osy rette keibir mańyzdy tustardy túsindirgim keledi. Eń aldymen, saiasi memlekettik qyzmetshiler degen kim? Ol – Prezidentke tikelei baǵynatyn jáne esep beretin ministrler, onyń orynbasarlary, memlekettik organdardyń birinshi basshylary, olardyń orynbasarlary, Nur-Sultan, Almaty, Shymkent qalalary men oblystardyń ákimderi, olardyń orynbasarlary, aýdan ákimderi», - dep jazdy ol Facebook paraqshasynda.
A.Shpekbaevtyń atap ótýinshe, saiasi basshynyń óz qyzmetin doǵarýǵa ótinish berýiniń basty sharty – oǵan tikelei baǵynyshty qyzmetkerge qatysty zańdy kúshine engen sottyń aiyptaý úkiminiń bolýy nemese aqtalmaityn negizder boiynsha qylmystyq isti toqtatý týraly sheshimniń qabyldanýy (amnistiia, shynaiy ókiný, taraptardyń tatýlasýy jáne t.b). Basshynyń jumystan ketýge ótinish beretin merzimi – 10 kúntizbelik kún. Ekinshi shart – tikelei baǵynyshty qyzmetker jasaǵan qylmystyń basshynyń saiasi laýazymǵa taǵaiyndalǵan kúninen bastap 3 ai ótkennen keiin jasalýy.
«Durys túsiný úshin «tikelei baǵynyshty» terminin túsindire keteiin. Ortalyq memlekettik organnyń basshysy úshin – ol onyń orynbasarlary, jaýapty hatshy nemese apparat basshysy, territoriialyq bólimshelerdiń basshylary. Oblystardyń, respýblikalyq mańyzy bar qalalardyń, astananyń ákimderi úshin – olardyń orynbasarlary, apparat basshysy, aýdan nemese oblystyq mańyzy bar qala ákimi. Ortalyq memlekettik organ basshysynyń orynbasary úshin (mysaly, vitse-ministr) – olar basshylyq etetin vedomstvonyń nemese derbes qurylymdyq bólimshelerdiń (departament, basqarma) basshylary. Oblystardyń, respýblikalyq mańyzy bar qalalardyń, astana ákimderiniń orynbasarlary úshin – jergilikti biýdjetten qarjylandyrylatyn olar basshylyq jasaityn atqarýshy organdardyń basshylary. Aýdan ákimi úshin – orynbasarlary, apparat basshysy, tikelei basshylyq jasaityn aýdandyq atqarýshy organdardyń basshylary, aýyl, kent, aýyldyq okýrgtardyń ákimderi», - dedi agenttik basshysy.
Onyń jazýynsha, «qyzmetten ketý» túsinigi tek saiasi qyzmetshilerge qatysty qoldanylady. Jumystan ketýdi qabyldaý nemese qabyldamaý – saiasi memlekettik qyzmetshini taǵaiyndaǵan tulǵanyń quzireti. Iaǵni, ortalyq memlekettik organdardyń basshylary, oblystardyń, respýblikalyq mańyzy bar qalalar men astananyń ákimderi úshin – Prezident, vitse-ministrler úshin – Premer-Ministr, oblystardyń, respýblikalyq mańyzy bar qalalar men astana ákimderiniń orynbasarlary úshin – oblystardyń, respýblikalyq mańyzy bar qalalar men astananyń ákimderi.
«Memlekettik ákimshilik qyzmetshiler bolyp tabylatyn basshylar - jaýapty hatshylar, apparat basshylary, ortalyq memlekettik organ komitetteriniń tóraǵalary jáne onyń orynbasarlary, departamentter men derbes basqarma basshylary osyǵan uqsas jaǵdailarda jumystan bosatýǵa deiin tártiptik jaýapkershilikke tartylatyn bolady. Sondai-aq tártiptik sanktsiialar memlekettik organdardyń, memlekettik uiymdardyń, kvazimemlekettik sýbektiler basshylarynyń sybailas jemqorlyqtyń aldyn alý boiynsha sharalar qabyldamaǵany úshin engiziledi. Mundaǵy másele ujymda sybailas jemqorlyqtyń aldyn alýdy óz mindetinde júieli túrde elemeýge qatysty bolyp otyr. Bizdiń mindetimiz – basshylardy óz ujymdarynda sybailas jemqorlyqtyń aldyn alýmen jáne eskertýmen sóz júzinde emes, is júzinde ainalysýǵa májbúrleý», - dedi A.Shpekbaev.
Agenttik basshysynyń atap ótýinshe, sybailas jemqorlyqqa qarsy zańnamaǵa jańa tolyqtyrýlar 10 jeltoqsannan bastap qoldanysqa engiziledi.
«Bul qosymshalar Elbasy men Prezidenttiń Qazaqstandaǵy sybailas jemqorlyqty túbegeili joiýǵa baǵyttalǵan júieli jáne kóregen saiasatynyń jemisi. Olardyń quqyq qoldaný tájiribesinde jańashyldyǵyn eskere otyryp, aldaǵy ýaqytta standartqa sáikes emes túrli jaǵdailar oryn alýy yqtimal. Biz ony sot organdarymen jáne prokýratýramen birlesip egjei-tegjeili zerdeleimiz», -dedi ol.
