Resei qorǵanys ministri Sergei Shoigý "arnaiy operatsiianyń birinshi kezeńindegi negizgi maqsattar oryndaldy, endi basty maqsat – Donbassty azat etýge kóńil bólýge bolady" dep málimdedi. Shoigýdyń sózin 28 naýryzda RIA Novosti agenttigi taratty, dep habarlaidy Azattyq.
Resei biligi Ýkrainadaǵy soǵysty "arnaiy operatsiia" dep ataidy.
"Ýkrainanyń áýe kúshteri men raketalarǵa qarsy júieleri joiyldy. Teńiz kúshterin de joidyq. Jaiaý áskeri men desanttyq áskerileri de kóp shyǵynǵa ushyrady" dedi Shoigý.
Búgin, 28 naýryzda Ýkraina qarýly kúshteri Resei Kiev jáne Chernigov oblysyndaǵy áskerileriniń bir bóligin shyǵaryp, Donetsk oblysyna jiberip jatyr dep málimdedi.
Soǵys bastalǵaly Resei biligi qarýly agressiiasynyń maqsatyn ártúrli sipattaǵan. Basyndaǵy maqsaty "demilitirizatsiia" men "denatsifikatsiia" jaily aitqan, keiin Kreml Kiev, Odessa siiaqty iri qalalardy basyp alýǵa tyrysty.
Biraq AQSh qorǵanys ministrligi jáne batys barlaýshylary Resei áskeri Ýkrainadaǵy soǵysta áskeri shyǵynǵa kóp ushyraǵanyn aitqan. Búgin, 29 naýryzda Stambýlda Resei-Ýkraina kelissóziniń kezekti raýndy bastaldy. Osy kezdesýdiń aldynda Britandyq Financial Times basylymy derekkózderine silteme jasap, Resei "denatsifikatsiia" talabynan bas tartqanyn jazdy.
"Eger Ýkraina ózin beitarap el dep jariialaityn bolsa, onda Kreml Ýkrainaǵa denatsifikatsiia jaily talap qoiýdan bas tartýǵa jáne Ýkrainanyń Eýropa Odaǵy quramyna enýine kelisim berýge ázir" dep jazdy Financial Times.
Ulybritaniia men AQSh barlaýshylary Resei qazir Qyrym túbegimen Reseidi bailanystyratyn qurlyqtyq jol ashý úshin Ýkrainanyń shyǵysyndaǵy qalalardy basyp alýǵa kúsh salady deidi.
Qazir Resei Ýkraina shyǵysyndaǵy Mariýpol qalasyn qorshaýǵa alǵan. Áskeri sarapshylar Resei Mariýpoldi basyp alý arqyly Qyrym men jikshil "DHR" men "LHR" separatistik aimaǵyn jalǵaityn jol ashýǵa tyrysady dep sanaidy.
