Foto: anatili.kazgazeta.kz
Almatyda belgili jazýshy-satirik, aqyn, elimizdiń qoǵam qairatkeri Shona Smahanulynyń ǵasyrlyq mereitoiyn atap ótti. Qalamgerdiń esimi berilgen bilim ordasynda ádebi-tarihi kesh uiymdastyryldy. Bul is-sharaǵa Qazaqstannyń eńbek sińirgen ustazy, Qazaqstannyń Eńbek Eri Aiagúl Mirazova, Qazaqstannyń eńbek sińirgen qairatkeri Asyly Osman, gimnaziianyń ardager ustazdary, oqýshylary men mektep ákimshiligi qatysty. Sondai-aq jiynǵa Shona Smahanulynyń uly Janserik Shonauly men nemereleri, gimnaziianyń oqýshylary Jánibek pen Janali Shonalar qatysty.
Mereitoilyq is-sharaǵa arnaiy kelgen qonaqtar gimnaziia aýmaǵynda jemis aǵashtaryn otyrǵyzyp, Shona Smahanulynyń ómiri men shyǵarmashylyǵy týraly syr shertetin jańa mýzeidiń saltanatty ashylýyna qatysty. Sondai-aq qadirli qonaqtar úshin gimnaziia ishinde arnaiy ekskýrsiia uiymdastyryldy, olar bilim ordasynyń oqý kabinetterin aralap, oqýshylarmen áńgimelesti.
Merekeli keshti ashqan gimnaziia direktory Miramgúl Nabidollaeva kelgen qonaqtarǵa alǵys bildirip, jinalǵandardy mereitoily datamen quttyqtady. Ol mekteptiń ashylýyna Shona Smahanulynyń ózi sebepker bolǵanyn aityp, biyl mekteptiń irgetasy qalanǵanyna 40 jyl tolyp otyrǵanyn atap ótti.
Al Qazaqstannyń Eńbek Eri Aiagúl Mirazova gimnaziia ustazdary men ardager muǵalimderdi qos merekemen quttyqtap, Shona Smahanuly týraly estelik aitty. Qazaqstannyń eńbek sińirgen ustazy osyndai is-sharalar mádeni muralardy saqtaýda, jas urpaqqa rýhani tárbie berýde máni zor ekenin erekshe atap ótti.
– 1976 jyly otbasymen birge Almatyǵa kóship keldim. Ol kezde qalada bir ǵana qazaq mektebi jumys isteitin. Ol mektepke men ornalasa almadym. Sondyqtan orys tilin jetik bilmesem de, orys mektebine jumysqa turýǵa májbúr boldym. Kelesi jyly №86 qazaq-orys mektebi ashylatynyn estip, birden sonda bardym. Qýanyshymda shek bolmady. Bul mektep Shona Smahanuly men onyń zamandastarynyń arqasynda ashylǵan edi. Men sol mektepte qyzmet jasai júrip Shona aǵamyzdy óz kózimmen kórdim. Ol jan-jaǵyna shýaq shashyp, bárimen qaljyńdasyp júretin tamasha adam edi. Qazaq mektepterin ashpasa, ult bolashaǵyna qaýip tónip turǵanyn aityp, Almatyda birneshe qazaq mektebiniń ashylýyna birden-bir sebepker bolǵanyn bárimiz jaqsy bilemiz. Bul – erlikke parapar izgi is. Barshańyzdy osy qos mereitoimen quttyqtaimyn, – dedi Aiagúl Mirazova.
Saltanatty kesh barysynda gimnaziia ujymyna basqa da tilekter aityldy. Al oqýshylar jinalǵandarǵa kontserttik baǵdarlama uiymdastyryp, aqynnyń shyǵarmalaryn jatqa aityp, óleńderin oryndady.
