Búgin Túrkistan oblysynyń ákimi Ómirzaq Shókeev jumys saparymen Maqtaaral aýdanyna bardy. Sapar barysynda oblys ákimi aldymen Jańajol aýyl okrýgine qarasty sý tasqynynan zardap shekken Órgebas eldimekenin qalpyna keltirý jumystarymen tanysty, dep habarlaidy oblystyq ákimdiktiń baspasóz qyzmeti.
Búgingi tańda munda 209 úidiń 184-iniń ielerimen kelisimshart túzilip, 184 otbasyna 8,5 mln teńge qarjy aýdarylǵan. Jalpy búgingi tańda buzylǵan úi sany 145-ke jetip otyr. Atalǵan 145 úidiń aýmaǵy tazartylyp, irgetasyn quiý jumystaryna daiyndalǵan. Al 122 úi irgetasy quiylyp, 31 baspananyń qabyrǵalary qalanýda.
Atqarylǵan jumystarmen tanysqan Ómirzaq Estaiuly úi qurylysyn jyldamdatý men aýlalardy qoqystan tazartý, jol jóndeý jumystaryn jedeldetýdi tapsyrdy. Aita keteiik, Órgebas aýylyna Jetisai aýdany jaýapty bop bekitilgen bolatyn. Qazir mundaǵy jumystarǵa 613 qurylysshy tartylǵan.
Munan soń oblys ákimi Firdaýsi aýylyna at basyn burdy. Munda da qurylys jumystary qarqyn alǵan. Qazirgi tańda Firdaýsidaǵy 340 úidiń 277 baspana ielerimen kelisimshart jasalyp, bárine derlik 8,5 mln teńgeden aýdarylǵan. Munda búginde 133 úidiń irgetasy quiylyp, 17 úidiń qabyrǵasy qalanýda. Sondai-aq, 1 úidiń shatyry jabylýda.
Oblys ákimi sapar barysynda Myrzakent kentindegi jańa móltek aýdanda júrgizilip jatqan qurylys jumystarymen de tanysty. Jańa móltek aýdanda búginde Jeńis, Jańaturmys, Dostyq eldi meken turǵyndarynyń kelisimi boiynsha 386 jeke turǵyn úidiń qurylysy júrgizilýde. Onyń ishinde 196 turǵyn úi memlekettik biýdjet esebinen, qalǵan 190 turǵyn úi («B.Ýtemýratov», «Saliqaly urpaq», «Biz Birgemiz») qorynan salynýda. Munda búginde 274 úidiń qabyrǵasy qalanyp, 65 úidiń shatyryn jabý jumystary jalǵasýda jáne 55 úidiń ishki syrtqy árleý jumystary júrgizilýde. 1-shildege deiin 100 úidiń shatyryn jabý josparlanyp otyr.
«Maqtaaral aýdanyndaǵy sý basqan 5 eldimekendegi tótenshe jaǵdai saldaryn joiý, jańa móltek aýdan men eki aýyldaǵy úi salý jumystaryn bir sátke de báseńdetýge bolmaidy. Eń bastysy – qurylystyń sapasyna mán berýimiz qajet. Sondai-aq, úi salýǵa bólinetin, 1000 dollarlyq, 100 myń teńgelik tólemderdi der kezinde aýdaryp berý, tóleý máselelerine jyldamdatý kerek. Tamyz aiynyń alǵashqy kúninde jańa móltek aýdandaǵy úilerdiń báriniń derlik shatyrlary jabylyp bitýi tiis», – dedi Ómirzaq Estaiuly.
Sapar sońynda óńir basshysy oblystyq shtabta májilis ótkizip, jaýapty basshylarǵa naqty tapsyrmalar júktedi. Sonyń ishinde úi qurylysy, bir rettik ótemaqy, aýyl sharýashylyǵy shyǵyndaryn óteý, Firdaýsi, Órgebas aýyldaryndaǵy tótenshe jaǵdai saldaryn joiý jumystary týraly kúndelikti málimet berip otyrýdy tapsyrdy.
