Óskemen qalasynda ótken «Týǵan jer» forýmynda «Meniń mektebim» jobasy iske qosyldy. Atalmysh joba aiasynda ShQO mektepteriniń himiia, fizika, biologiia, robototehnika synyptary zamanaýi tehnikalarmen jabdyqtalmaq.
«Týǵan jer» forýmyna qatysqan aimaq basshysy jobamen tolyqtai tanysyp, balanyń dúnietanymyn erte jastan qalyptastyrý úshin jaǵdai jasaý qajettigin aityp ótti. Joba boiynsha, orta bilim oshaqtarynyń synyptary Nazarbaev ziiatkerlik mektebinde ornatylǵan tehnikalar syndy jańa qural-jabdyqtarmen qamtylmaq.
– Biz Nazarbaev ziiatkerlik mektebiniń oqý tájiribesin jáne kórsetkishterin tolyqtai zerttep, qorytyndy shyǵardyq. Qazirde oblystaǵy 277 mektepte 425 synypty jańashalandyryp, qural-jabdyqtar ornatý qajet. Sonyń ishinde, 38 fizika synybyn, 37 himiia, 78 biologiia, 272 robototehnika synyptaryn jalpy quny 2,8 mlrd teńgege jabdyqtaimyz, – dedi oblys basshysy Danial Ahmetov.
Qazirdiń ózinde bilim salasyna qoldaý kórsetip jatqan kásipkerler az emes. Shemonaiha aýdanynda ornalasqan «Vydrihinskoe» JShS basshysy Aleksandr Belkin óz qarajatyna Vydriha aýyldyq orta mektebiniń synybyn robototehnika synybymen jabdyqtady. Al zaisandyq kásipker, «Bota» sharýa qojalyǵynyń basshysy Qaratal aýyldyq orta mektebiniń geografiia synybyn jabdyqtaýǵa qoldaý kórsetken.
Forým barysynda ShQO ákimi Danial Ahmetov aityp ótkendei, bilim salasyna bólingen investitsiia – memleket damýynyń kepili.
