Keshe Shyǵys Qazaqstan oblysyndaǵy Shemonaiha aýdanynyń Joǵarǵy-Úbe aýylynda apattyq-qutqarý qyzmeti taǵy bir top adamdy qaýipsiz jerge kóshirdi, dep habarlaidy "Ult aqparat" QR IIM Tótenshe jaǵdailar komitetiniń baspasóz qyzmetine silteme jasap.
«Sý basqan úilerden 65 adam evakýatsiialandy, olardyń ishinde 13 bala bar. Turǵyndar ýaqytsha týystarynyń úilerine ornalastyryldy. Tańerteń adamdardyń basym bóligi óz baspanalaryna qaita oraldy», - dep jazylǵan habarlamada.
Sýdyń kóbeiýine tolassyz jańbyr men jer tońynyń qalyń bolýy áser etken. Taý sýynyń quiylýyna bailanysty Losiha, Maraliha, Kozlýshka ózenderi arnalarynan tasyǵan. Úbe ózeninde seńniń keptelip qalýy da jaǵdaidy qiyndata túsken. Muz kesekterin júrgizý úshin 720 keli jarylǵysh zattar qoldanylyp, aldyn ala jarý jumystary júrgizildi.
Sýdan eń kóp zardap shekken aýyldar qatarynda Joǵarǵy-Úbe jáne Vydriha aýyldary bar. Munda on shaqty úidi sý basty. Ýbinka, Pervomai, Novo-Ilinka, Rýliha, Oktiabr aýyldarynda birneshe aýlaǵa sý kirip ketti.
Qazir qarǵyn sýdy soryp, qumqap tóseý jumystary júrgizilip jatyr.
Buǵan deiin habarlaǵanymyzdai, Shyǵys Qazaqstan oblysyna Ońtústik Qazaqstan, Almaty oblystarynyń tótenshe jaǵdailar departamentteriniń qutqarý kúshteri, Almaty qalasynda ornalasqan Respýblikalyq jedel qutqarý jasaǵy jiberildi. Sonymen qatar Ońtústik Qazaqstan oblysynan ushaqpen lai sýlardy soryp alatyn motopompalar jetkizildi.
Óńirdegi birneshe eldi mekendi sý basyp, adamdar evakýatsiialanýda. Jergilikti deńgeidegi tótenshe jaǵdai rejimi jariialanýda. Úileri qiraǵan turǵyndarǵa jańa baspana berý máselesi sheshilýde.
