Qutqarýshylar Shyǵys Qazaqstannyń Kúrshim aýdanynda balasyn qutqaram dep sýǵa ketken imamnyń denesin izdeýde, dep habarlaidy "Ult aqparat".
Qaiǵyly oqiǵa jeksenbi kúni Boran aýylynda bolǵan. Aýyl imamynyń 8 jasar balasy Qara Ertiske shomylyp júrgen. Qatty aǵysqa tótep bere almaǵan bala bata bastaidy. Ony qutqarýǵa 36 jastaǵy ákesi men 19 jastaǵy aǵasy da sýǵa sekiredi. Kýágerlerdiń aitýynsha, sýdyń aǵysyna eresekter de tótep bere almaǵan. Saldarynan aýyl imamy eki balasymen birge sýǵa ketken.
«Qazir taý ózenderi tasyp jatqandyqtan, sý lai, aǵysy qatty. Ózen boiynda iirimder kóp. Qutqarýshylar marqumdardyń denesin motorly qaiyqpen izdeýge májbúr. Súńgýirler tereń iirimderge tap bolýy múmkin. Sondyqtan izdeý jumystary asqan saqtyqpen júrgizilýde», - deidi shyǵys óńirlik aeroutqyr qutqarý jasaǵynyń №9 bólimshe basshysy Talǵat Nurjanov.
Imam men onyń uldaryn izdeýge aýyldastary da atsalysýda. Jalpy izdeý jumystaryna 80 adam, 11 qaiyq jumyldyrylǵan.
Demalys kúnderi qutqarýshylar úshin mazasyz ótti. Zaisan kólinde 10 kún buryn joǵalǵan balyqshylardan áli derek joq. Al Úrjar aýdanyndaǵy Sasyqkólden balanyń denesi izdestirilýde. Óskemenniń ózinde qutqarýshylar 31 jastaǵy jigittiń denesin Ertisten izdep júrgeli aiǵa jýyq ýaqyt boldy.
