Shyǵys Qazaqstannyń ekologiialyq problemalaryn sheshýge baǵyttalǵan jol kartasynda 35 is-shara kózdelgen. Bul sharalar týraly Úkimet otyrysynda Ekologiia geologiia jáne tabiǵi resýrstar ministri Maǵzum Myrzaǵaliev pen Shyǵys Qazaqstan oblysynyń ákimi Danial Ahmetov tolyǵyraq aityp berdi, dep habarlaidy QazAqparat.
Maǵzum Myrzaǵaliev ol sharalarda Ridder metallýrgiia kombinatyn ekologiialyq taza tehnologiialarmen jabdyqtaý, Óskemen qalasynda ornalasqan JEO-daǵy ziiandy gazdan tazartý qurylǵylaryn jańǵyrtý, qoldanystaǵy kárizdik tazartý keshenderin qaita jańartý, radioaktivti lastanýdyń jergilikti oshaqtaryn anyqtaý jáne joiý, ruqsat etilmegen qoqys tastaityn jerlerdi joiý jumystary qarastyrylǵanyn jetkizdi.
Al Danial Ahmetov óńirdegi ekologiialyq problemalardy keshendi túrde sheshýdiń jospary iske asyrylyp jatqanyn sóz etti.
Onyń aitýynsha, ekologiiany jaqsartýǵa baǵyttalǵan investitsiianyń jalpy somasy - 60 mlrd teńge.
«Atap aitqanda, bes jyldyń ishinde atmosferany jaqsartýǵa 24 mlrd teńge investitsiia salynady. Onyń 22,1 mlrd teńgesi Ridder metallýrgiialyq keshenindegi tseh qurylysyna beriledi. Bul – Ridder qalasy boiynsha atmosferaǵa kúkirt dioksidin shyǵarýdyń 714 tonnaǵa nemese 20 paiyzǵa azaitýǵa múmkindik beredi. Bul oraida keiingi 7 jylda aýanyń lastaný deńgeii oblys boiynsha 10 myń tonnaǵa, Óskemen qalasy boiynsha 7 myń tonnaǵa azaiǵanyn atap ótý qajet. Osy kezeń ishinde iri kásiporyndar tabiǵat qorǵaý is-sharalaryna 35,2 mlrd teńge investitsiia saldy», - dedi ol.
Óńir basshysy oblys ortalyǵynda Ekologiialyq-qoǵamdyq monitoring júiesi jumys isteitinin, ekologiialyq aqparatty onlain rejimde kedergisiz alý úshin jaǵdai jasalǵanyn málim etti.
Sondai-aq Shyǵys Qazaqstanda eldi mekenderdiń jasyl beldeýleri qurylýda. Ótken jyly 175 myń, al biyl 30 myń kóshet egilgen.
Ormandardy qalpyna keltirý jáne kógaldandyrý jóninde 2025 jylǵa deiingi is-sharalar jospary ázirlengen.
