Bas prokýratýra shetelge zańsyz shyǵarylǵan múlikke tyiym salý ótinishin qai qujattyń negizinde joldaitynyn aitty, dep habarlaidy QazAqparat.
«Bas prokýratýra quqyq qorǵaý organdaryna sheteldegi qylmystyq kiristerdi izdeý, tyiym salý jáne tárkileý boiynsha qoldaný men jumysta paidalaný úshin berilgen satylyq algoritmderdi, ádistemeler men suraýlardyń úlgilerin daiyndady. Qylmystyq aktivterdiń shetelge shyǵarylý dáleldemeleriniń jinalýyna qarai qarjylyq barlaý bólimsheleriniń (álemniń 160 elinen astam qarjylyq barlaý arasyndaǵy elektrondyq aqparat almasýdyń «Egmont» jelisi arqyly) múmkindikterin paidalana otyryp, qylmystyq jolmen alynǵan aktivterge tyiym salý boiynsha jedel sharalar qabyldanýda. Bas prokýratýra keiinnen quqyqtyq kómek kórsetý týraly (Qylmystyq-protsestik kodekstiń 560-babyna sáikes), onyń ishinde sheteldegi múlikke tyiym salý jáne tárkileý úshin suraýlar joldaidy», - dep jazylǵan quzyrly organnyń redaktsiia saýalyna joldaǵan jaýabynda.
Resmi jaýapqa súiensek shet memleketterge ondai ótinish jasaý úshin ekijaqty kelisim bolǵany kerek.
«Ótinim joldaýdyń quqyqtyq negizi retinde Bas prokýratýranyń qylmystyq-quqyqtyq saladaǵy jasasqan ekijaqty kelisimderi bolyp tabylady. Búgingi kúni 34 memleketpen 72 ekijaqty kelisimge (onyń ishinde AQSh-pen, Ulybritaniiamen, Monakomen, Ispaniiamen, Italiiamen, BAÁ-men jáne t.b. kelisimderge) qol qoiyldy. Quqyqtyq kómek kórsetý týraly suraýlardy, onyń ishinde «KARIN» jáne «ARIN» (Eýropa, Aziia jáne álemniń basqa elderi prokýrorlarynyń aktivterdi qaitarý jónindegi jelileri) arnalary arqyly súiemeldeý jáne olardyń oryndalýyn tezdetý turaqty negizde pysyqtalady», -delingen jaýapta.
Sondai-aq Bas prokýratýra ókilderi qazir qaralyp jatqan isterdiń egjei-tegjeiin BAQ-qa málim etý Qazaqstan zańnamasyna qaishy ekenin jazǵan.
«Degenmen qylmystyq ister boiynsha sotqa deiingi tergep-tekserý derekteri jariia etilmeýge tiis (QPK-niń 201-babynyń 1-bóligi). Osyǵan orai qazirgi ýaqytta atalǵan sotqa deiingi is júrgizýler boiynsha neǵurlym egjei-tegjeili aqparatty jariialaý múmkin emes. Sondai-aq, Ekonomikalyq resýrstardyń zańsyz shoǵyrlanýyna qarsy is-qimyl máseleleri jónindegi vedomstvoaralyq komissiianyń qyzmetin buqaralyq aqparat quraldarynda jariialaý Qazaqstan Respýblikasy zańnamasymen qorǵalatyn qupiiany ashýǵa qoiylatyn talaptary eskerile otyryp júzege asyralatynyn habarlaimyz», - dep jazylǵan Bas prokýratýra málimetinde.
