Foto: kolesa.kz
IIM Ákimshilik politsiia komiteti tóraǵasynyń mindetin atqarýshy Qaisar Sultanbaev 2022 jylǵy 1 qyrkúiekke deiin ákelingen sheteldik avtokólikterdi zańdastyrý qalai júrgiziletinin aitty, dep habarlaidy Sputnik Qazaqstan.
Ol 2022 jylǵy 1 qyrkúiekke deiin ákelingen sheteldik avtokólikterdi bastapqy tirkeý úshin 200 myń teńge alym tóleý qajet ekenin atap ótti. IIM zańdastyrýdy júrgizýdiń tártibin, sharttary men merzimderin aiqyndaityn Úkimet qaýlysynyń jobasyn ázirleidi. Zańdastyrý qajetti zańnamalyq ózgerister qoldanysqa engizilip, úkimettiń tiisti qaýlysy qabyldanǵannan keiin bastalady.
"Zańdastyrýdy alty ai ishinde júrgizý josparlanyp otyr. Zańdastyrylatyn avtokólikterge úsh negizgi talap qoiylady: avtokólik izdeýde bolmaýy kerek, kedendik tazartýdan ótýi qajet jáne elge 2022 jylǵy 1 qyrkúiekke deiin ákelingen bolýy shart", - dedi Sultanbaev ortalyq kommýnikatsiialar qyzmetinde ótken baspasóz máslihatynda.
Zańdastyrýǵa jatatyn avtomobilderge jasyna jáne ekologiialyq klasyna eshqandai talap qoiylmaidy. Kóliktiń el aýmaǵyna kirgizilgen kúni UQK Shekara qyzmetiniń nemese memlekettik kirister organdarynyń derekter bazasy arqyly anyqtalady. Búginde ol protsess tolyǵymen avtomattandyrylǵan.
"Sondai-aq shekara qyzmetinde nemese memlekettik kirister organdarynda kólikti ákelý týraly málimetter bolmaǵan jaǵdaida, avtokóliktiń Qazaqstanda naqty bolý kúni avtosaqtandyrý polisiniń alǵashqy rásimdelgen kúni boiynsha aiqyndalady", - dep naqtylady IIM ókili.
Zańdastyrýǵa ótinishti elektrondy úkimet portaly nemese mamandandyrylǵan HQKO-ǵa jeke ótinish jasaý arqyly berýge bolady. Usynylǵan qujattar men kólik izdestirý bazalary boiynsha tekseriledi. Odan keiin avtokólik mamandandyrylǵan HQKO-nyń tekserý pýnktinen nómirlik agregattardy salystyrý úshin usynylady.
"Sodan keiin eger talap etilse, avtokólikke kedendik deklaratsiialaý júrgiziledi. 200 myń teńge mólsherinde bastapqy alym, sondai-aq tehpasport pen memlekettik nómir úshin memlekettik baj tólenedi. Tirkeý bekitilgennen keiin avtokólik iesine qazaqstandyq tehpasport jáne memlekettik nómir beriledi", - dedi Sultanbaev.
Budan bólek, Ekologiialyq kodekske zańdastyrylatyn avtokólikter úshin kádege jaratý tólemin alyp tastaý bóilignde túzetýler engiziledi. Qazir zań jobasyn Parlament qarap jatyr.
