Sheteldik investorlardy qandai salalar qyzyqtyrady? Bul jaily ranking.kz zertteý júrgizgen. Zertteý nátijesinde olardyń shikizattyq emes salalarda birqatar jobany iske asyryp jatqany anyqtaldy, dep habarlaidy "Ult aqparat".
Koronavirýs pandemiiasy Qazaqstan ekonomikasyn 2,6% deńgeiinde tómendetti. Áitse de búkil álemdegi iri derjavalardyń ekonomikasyna qaraǵanda bul kórsetkish sonshalyqty quldyraý emes. Máselen, Halyqaralyq valiýta qorynyń baǵalaýynsha, COVID-19 indetiniń saldarynan jahandyq jalpy ishki ónim 4,4% tómendegen. Atap aitqanda, AQSh ekonomikasy 4,3%, Úndistan 10,3%, Japoniia 5,3%, Germaniia 6%, al Resei 4%-ǵa quldyraǵan.
«Daǵdarystyń el ekonomikasyna áserin barynsha azaitý úshin Qazaqstan shikizattyq emes salalardaǵy investitsiialyq belsendilikti arttyryp, shynaiy sektordyń ósimin qamtamasyz etti, saýda balansynyń oń saldosyn saqtap, ekonomikany nesielendirý kórsetkishin ulǵaitty. 2020 jyly shynaiy sektordyń ósimi 2% qurap, ekonomikalyq draiverge ainalǵanyn atap ótý kerek. Shynaiy sektor men qyzmettiń jekelegen túrleriniń barlyǵynda oń ósim baiqalady. Máselen, bul kórsetkish qurylys salasynda 11,2%, aqparat jáne bailanys salasynda 8,6%, aýyl sharýashylyǵynda 5,6%, óńdeý ónerkásibinde 3,9%, bilim salasynda 2,3%-ǵa artqan», - delingen zertteýde.
Jalpy ekonomikanyń qurylymy da sapaly túrde jaqsaryp qalǵanyn atap ótý kerek. 2020 jyly ónerkásip óndirisiniń jalpy kóleminiń ishinde óńdeý segmenti 39,4%-dan 48,8%-ǵa artty. Jeńil ónerkásipte, avtokólik quraýda jáne daiyn metall buiymdarynyń óndirisinde eki ese ósim baiqalǵan. Óńdelgen jáne daiyn taýarlardyń eksporty da artty. Osylaisha ekonomikany ártaraptandyryp, shikizattyq emes sektordyń damytýǵa baǵyttalǵan baǵdar daǵdarystyń teris saldaryn eńserýge kómektesti.
2020 jylǵy qazan aiynyń basyndaǵy merzimge qaraǵanda elde sheteldik investorlardyń qatysýymen shikizattyq emes salalalarda 200-ge tarta investitsiialyq joba júzege asyrylyp jatqan. Atap aitqanda bul jobalar agroónerkásip, taý-ken ónerkásibi, kólik quraý, munai-gaz himiiasy men himiialyq ónerkásip salasy, balamaly qýat kózderi, kólik jáne logistika salalarynda iske asyrylǵan.
Qazaqstan ekonomikasynyń shikizattyq emes sektoryna sheteldik investitsiialardy kóbirek tartyp, investorlarǵa investitsiialyq protsestiń barlyq satysynda qoldaý kórsetý úshin «Astana» Halyqaralyq qarjy ortalyǵynda «Qazaqstannyń investitsiialyq damý qory» qory jumys isteidi. Bul rette basymdyqqa ie investitsiialyq salalarǵa agroónerkásiptik keshen, infraqurylymdyq jobalar (energetika, kólik, logistika, IT jáne taǵy basqa) jatady. 2020 jyly Qazaqstannyń investitsiialyq qoryna 103,8 mlrd teńgege deiin kapital salynǵan.
2020 jylǵy 17 qarashada Sheteldik investorlardyń keńesinde Memleket basshysy básekege qabiletti salalardy ataǵan edi. Olardyń ishinde IT salasyna aldaǵy 5 jylda 500 mlrd teńge tartý kózdelgen. IT naryǵyn, injiniringti jáne basqa da joǵary tehnologiialy qyzmetterdi damytý eksportqa salmaqty múmkindikterdi ashyp, kásiporyndarǵa sátti túrde ózara básekelesýge jol ashady. Artyqshylyǵy mol taǵy bir sala – farmatsevtika. 2025 jylǵa deiin Qazaqstan jeke farmóndiristiń úlesin 50%-ǵa deiin arttyrýdy kózdeidi.
