Shetelde júrgen 8 322 Qazaqstan azamaty daýys berdi. Bul týraly búgin QR Syrtqy ister ministriniń orynbasary Roman Vasilenko aitty, dep habarlaidy QazAqparat tilshisi.
«Qazaqstannyń sheteldegi mekemeleri janynan 64 sailaý ýchaskesi quryldy. Sheteldegi mekemeler janyndaǵy sailaý ýchaskeleri týraly aqparattar mekenjaiy, bailanys málimetteri kórsetile otyryp, ministrliktiń jáne Ortalyq sailaý komissiiasynyń veb-saittarynda sheteldegi mekemelerdiń internet resýrstarynda, diplomatiialyq ókildikterdiń áleýmettik jelilerdegi paraqshalaryna ornalastyryldy», - dedi ministrdiń orynbasary Ortalyq sailaý komissiiasynda ótken brifing barysynda.
Onyń atap ótýinshe, shetelge jeke shaqyrýmen, qyzmetti, iskerlik saparmen jáne týrist retinde barǵan Qazaqstan azamattary ulttyq tólqujatyn kórsetken jaǵdaida, sailaýshylar tizimine engiziledi.
«Biylǵy 9 maýsymdaǵy derekterge sáikes sheteldegi sailaýshylar tizimine 15 349 azamatymyz tirkelgen. Shetelde daýys berý tynysh ótip jatyr. 12 ýchaskede Qazaqstannyń qoǵamdyq birlestikteri men kommertsiialyq uiymdarynan jáne TMD missiiasynan 35 baiqaýshy qatysyp jatyr. Nur-Sultan qalasynyń ýaqytymen saǵat 19-00-de shetelde 8322 azamatymyz daýys berdi. Bul sheteldegi tizimge engen sailaýshylardyń 54,2 paiyzyn quraidy», - dedi R.Vasilenko.
Sonymen qatar vitse-ministr sailaý ýchaskesi joq shet memlekette júrgen azamattarymyzǵa kórshiles elderde ashylǵan sailaý ýchaskesine baryp daýys berýge keńes berdi. Sheteldegi sailaý ýchaskeleri jergilikti ýaqyt boiynsha tańerteńgi 07-00-den 08-00-ge deiin jumys isteitindigin eskertti.
«Ýaqyt aiyrmashylyǵyna bailanysty Aziiada ornalasqan sailaý ýchaskeleri jumystaryn aiaqtap, daýystardy sanaýǵa kiristi. Nur-Sultan ýaqytymen 17-00-de Vashington, Niý-Iork jáne Ottavadaǵy sailaý ýchaskeleri sońǵy bolyp ashyldy. Daýys berý qorytyndysy shyǵarylǵannan keiin túpnusqa qujattar Esil aýdandyq sailaý komissiiasyna der ýaqytynda jetkizilýi úshin jedel Syrtqy ister ministrligine tapsyrylatyn bolady», - dedi ol.
