Qazaqstandaǵy shetel azamattary ózderiniń el aýmaǵynda júrip-turý quqyǵyn qaita zańdastyrýy tiis. Bul týraly QR UQK Shekara qyzmetiniń shekaralyq baqylaý departamenti basshysynyń orynbasary Muńdash Mollashev málim etti, dep habarlaidy QazAqparat.
«2021 jylǵy 5 maýsymda shetel azamattarynyń Qazaqstan Respýblikasynyń aýmaǵynda ýaqytsha bolý merzimi aiaqtalady. Atalǵan merzim vedomstvoaralyq komissiianyń (VAK) 2020 jylǵy 29 jeltoqsandaǵy sheshimimen pandemiiaǵa bailanysty uzartylǵan bolatyn. Qazirgi ýaqytta Qazaqstan Respýblikasynyń memlekettik shekarasy arqyly qurlyqtaǵy jáne aviatsiialyq ótkizý beketteri shtattyq rejimde jumys isteidi. Sondai-aq, búginde 15 memleketpen (Resei Federatsiiasy, Belarýs Respýblikasy, Qyrǵyzstan Respýblikasy, Ózbekstan Respýblikasy, Tájikstan Respýblikasy, Koreia Respýblikasy, Ýkraina, Túrkiia, Egipet, Germaniia, Birikken Arab Ámirlikteri, Niderlandy Koroldigi, Grýziia, Chernogoriia, Shri-Lanka) turaqty áýe qatynasy qaita jańartyldy», - dedi Muńdash Mollashev atalǵan vedomstvoda onlain ótken baspasóz máslihatynda.
Onyń aitýynsha, Qazaqstan aýmaǵyna 101 shekaralyq beket arqyly kirýge bolady.
Onyń ishinde avtomobil jolaýshylaryna arnalǵan 51 beket, 19 áýe jáne 3 teńiz beketi qyzmet etedi.
Sondai-aq, ol karantin shekteýlerine bailanysty búginde 12 bekettiń qyzmeti ýaqytsha toqtatylǵanyn tilge tiek etti.
«Ulttyq qaýipsizdik komitetiniń shekara qyzmeti sheteldikterdi azamattyǵy bar elge kedergisiz qaitarý boiynsha sharalar qabyldaýda. Atap aitqanda, karantindik shekteýler kezinde, onyń ishinde onlain formatta adamdardyń elden shyǵý tártibin túsindirý uiymdastyryldy. Osy oraida ákimshilik jaýapqa tartylmas úshin sheteldikter men olardy shaqyratyn adamdarǵa Qazaqstan aýmaǵynda odan ári júrip-turýdy 5 maýsymǵa deiin zańdastyrý qajettigin eskertkimiz keledi», - deidi ol.
