Memleket basshysy Qasym-Jomart Toqaevtyń atyna Qazaqstan Respýblikasynyń Táýelsizdik merekesine orai quttyqtaýlar kelip túsýde, – dep habarlaidy «Ult aqparat» Aqordaǵa silteme jasap.
Memleket basshysy Qasym-Jomart Toqaevtyń atyna Qazaqstan Respýblikasynyń Táýelsizdik kúni merekesine orai shet memleketterdiń basshylarynan quttyqtaý hattar men jedelhattar kelip tústi.
Amerika Qurama Shtattarynyń Prezidenti Donald Tramp jedelhatynda eliniń jáne jeke óz atynan Qazaqstan halqyn Táýelsizdiktiń 28 jyldyǵymen quttyqtaǵan.
«Berik seriktestigimizdiń arqasynda sońǵy 12 ai ishindegi qol jetkizgen jarqyn jetistikterimizdi zor qýanyshpen atap ótkim keledi. Bizdiń iadrolyq qarýdy taratpaýdan bastap terrorizmge qarsy kúreske deiingi máselelerdi sheshý isindegi yntymaqtastyǵymyz álemdi edáýir qaýipsiz ári turaqty etti», – delingen jedelhatta.
Donald Tramp Qasym-Jomart Toqaevtyń Qazaqstan Prezidenti retinde Táýelsizdik merekesin alǵash atap ótip otyrǵanyn aityp, jańa jyldyń tabysty bolýyna tilektestik bildirgen.
«Amerika Qurama Shtattary Sizben jáne Qazaqstan halqymen jemisti jumys isteýge daiyn. Sizdiń kúsh-jigerińizdiń arqasynda Qazaqstannyń bolashaǵy jaryq ári tabysty bolady dep senemin», – delingen AQSh Prezidentiniń quttyqtaýynda.
Úndistan Prezidenti Ram Nat Kovind óz quttyqtaýynda memleketter arasyndaǵy ózara bailanystardyń tarihi arqaýy berik ekenin atap ótip, Qazaqstannyń ósip-órkendei berýine niettestik tanytqan.
«Úndistan men Qazaqstan arasyndaǵy qarym-qatynastar ǵasyrlar boiy jalǵasyp kele jatqan tarihi jáne mádeni bailanystarǵa negizdelgen. Eki el arasyndaǵy kópjaqty jáne ekijaqty qatynastar strategiialyq seriktestikke ulasty. Yntymaqtastyǵymyz odan ári nyǵaia túsetinine senimdimin», – delingen quttyqtaý hatta.
Ispaniia Koroli Felipe óz quttyqtaý hatynda ispan halqy men Úkimetiniń atynan Qasym-Jomart Toqaevty Táýelsizdik kúnimen quttyqtap, dostas Qazaqstan jurtyna beibitshilik jáne baq-bereke tiledi. Singapýr Respýblikasynyń Prezidenti Halima Iakob Qasym-Jomart Toqaevty jáne Qazaqstan halqyn Táýelsizdik kúnimen quttyqtady.
«Singapýr men Qazaqstan arasynda jaqsy dostyq qarym-qatynas ornaǵan. Eki el arasynda taýar ainalymy ulǵaiyp, quqyq jáne qarjy salalaryndaǵy yntymaqtastyqtyń nyǵaiyp kele jatqanyna qýanyshtymyn. Halyqtarymyzdyń igiligi úshin Ózińizben birlesip jumys isteýge jáne bailanystarymyzdy odan ári arttyra túsýge niettimiz», – dep jazǵan Halima Iakob.
Memleket basshysy men Qazaqstan halqyn Táýelsizdik kúnimen quttyqtap, baq-bereke tilegen jedelhat Avstriia Prezidenti Aleksandr Van der Bellennen de kelip tústi.
«Eki el arasyndaǵy barlyq sala boiynsha qarqyndy damyp kele jatqan yqpaldastyqty, onyń ishinde, ekonomikalyq yntymaqtastyqty tabysty damyta beremiz dep senemin», – delingen jedelhatta.
Avstraliia Odaǵynyń General-Gýbernatory Devid Herli óz quttyqtaý hatynda memleketter arasyndaǵy ekijaqty dostyq qatynastardyń odan ári dami beretinine senim bildirgen.
