Foto: Halyq Uni
Almaty turǵyny ózin quqyq qorǵaý qyzmetkeri, joǵary laýazymdy sheneýnikterdiń kómekshisimin dep tanystyryp, paraǵa ártúrli máseleni sheshýdi usynǵan, - dep habarlaidy "Ult aqparat" Antikor baspasóz qyzmetine silteme jasap.
"Sybailas jemqorlyqqa qarsy is-qimyl agenttigi memlekettik organdardyń qyzmetine bailanysty qandai da bir máseleni sheshý syltaýymen alaiaqtyqtyń, onyń ishinde para berýge itermeleýmen ushtasqan alaiaqtyqtyń jalǵasyp jatqan jaǵdailaryna nazar aýdarady.
Atap aitqanda, Almaty qalasy boiynsha Sybailas jemqorlyqqa qarsy qyzmet departamenti 1986 jyly týǵan qala turǵynyna qatysty qylmystyq isti tergep jatyr.
Ol ózin quqyq qorǵaý organdarynyń qyzmetkeri, joǵary laýazymdy sheneýnikterdiń kómekshisi retinde tanystyryp, ártúrli máseleni sheshý boiynsha óz qyzmetterin usynǵan. Sondai-aq, aldaý jáne senimdi teris paidalaný arqyly azamattardyń múlkin asa iri kólemde jymqyrǵan. Aqshalai qarajat memlekettik organdarda oń sheshim qabyldatýǵa arnalǵan" - delingen habarlamada.
Agenttik málimetinshe, kúdikti sot sanktsiiasymen qamaýǵa alyndy. Al qolda bar málimetterge sáikes, azamat basqa da osyndai qylmystar jasaǵan bolýy múmkin.
"Eger Siz nemese Sizdiń tanystaryńyz kúdiktiniń áreketinen zardap shegip, sondai-aq tergeý amaldaryna paidaly aqparatqa ie bolsa, Sybailas jemqorlyqqa qarsy qyzmetke kelesi tásilderdiń birimen habarlasýyńyzdy suraimyz:
1. Departamentke myna mekenjai boiynsha habarlasyńyz: Almaty qalasy, Jibek joly kóshesi, 15
2. 8 (7272) 78-73-00 nemese 1424 nómirlerine qońyraý shalyńyz
3. Telegram-bot @antikorkz_bot jazyńyz" - delingen habarlamada.
Konstitýtsiianyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árbir adam kinásiz dep esepteledi.
