Foto: aktobetimes.kz
Jol salý barysynda ondaǵan milliard teńge urlanǵan. Prokýratýra 23 qylmystyq is qozǵady, - dep habarlaidy Massaget.kz portaly Bas prokýratýranyń baspasóz qyzmetine silteme jasap.
Vedomstvoda ártúrli shemalardy ashý boiynsha júrgizilip jatqan jumystar týraly habarlandy, ol úshin qadaǵalaý organy "QazAvtoJol "UK" AQ-da, Avtomobil joldary komitetinde jáne jergilikti ákimdikterde tiisti tekserýler júrgizedi.
"Bul jumys jemisin berip jatqany sózsiz. Jol qurylysy kezinde 43,4 milliard teńge urlanǵan, ol túgeldei derlik "QazGerStroi" JShS qaltasyna túsken. Sonymen qatar, segiz jobalyq-smetalyq qujattamany ázirleýge bólingen qarajatty tiimsiz paidalaný derekteri anyqtaldy. Áńgime 600 million teńge týraly bolyp otyr", - dedi Bas prokýratýra ókilderi.
Resmi derekterge súiensek, bes orta jáne aǵymdaǵy jóndeý nysany boiynsha jobalaý-smetalyq qujattamany jasaý kezinde sheneýnikter baǵalaý qun somasyn eki milliard teńgeden asa arttyrǵan.
"Biýdjet aqshasyn jymqyrý úshin merdigerler qurylys materialdaryna 70 jalǵan sertifikat paidalanǵan, on jaǵdaida standartqa sáikes kelmeitin materialdar paidalanylǵan. Tekserý barysynda merdigerlerdiń oryndalmaǵan sharttyq mindettemeler men ósimpuldar boiynsha qaryzdaryna sheneýnikter kóz jumǵany belgili boldy. Nátijesinde merdigerlerdiń sharttyq mindettemelerdi buzǵany úshin ótelmegen debitorlyq bereshegi 6,8 milliard teńge, al ósimpul somasy 636 million teńge bolǵan", - dedi Bas prokýratýra ókilderi.
Prokýratýrada alym jinaý júiesin engizý boiynsha investitsiialyq jobany júzege asyrý týraly da suraqtar kóterildi.
"Olar jetkizýshi - Computer Vision Technologies JShS qyzmetteriniń baǵasy úsh ese artyp, 138,8 milliard teńge bolýymen bailanysty boldy. Qazirgi ýaqytta qarajatty iemdený men ysyrap etýdiń, sondai-aq laýazymdyq ókiletti teris paidalanýdyń barlyq deregi boiynsha (osynyń barlyǵynan zalal 45 milliard teńgeden asady) 23 qylmystyq is qozǵaldy. Budan ári tergeýmen sybailas jemqorlyqqa qarsy qyzmet pen finmonitoring agenttigi ainalysady", - dep habarlady Bas prokýratýra.
Resmi aqparatqa sáikes, prokýrorlar 24 milliard teńge bolatyn biýdjet shyǵynynyń aldyn alyp, 17,3 milliard teńge bolatyn zańsyz tenderlerdiń nátijelerin joidy.
