Búgin Parlament Májilisinde ótken Úkimet saǵatynda qazaqsha qoiylǵan suraqtarǵa tek orys tilinde jaýap qaitarylýy depýtat Baqytjan Ábdiraiymnyń namysyna tidi, dep jazady QazAqparat.
Aita keteiik, QR Ishki ister ministri Qalmuhanbet Qasymov bas bostandyǵynan aiyrý oryndarynan bosatylǵan jáne probatsiia qyzmetinde esepte turǵan azamattardy áleýmettik ońaltýdyń 2017-2019 jyldarǵa arnalǵan keshendi strategiiasyn iske asyrý taqyrybyndaǵy Úkimet saǵatynda baiandama jasaǵan bolatyn. «Búgingi bizdiń talqylap jatqan taqyryptyń óte mańyzdy ári ózekti ekeni belgili. Biraq budan da zor bir máselege biz búgin jaýap tappadyq, qurmetti áriptester! Sondyqtan bul jait meniń kóńilime, namysyma qatty tidi. Atap aitqanda, qazaq tilindegi, iaǵni memlekettik tilde qoiylǵan 12 suraqtyń 11-ine orys tilinde jaýap berildi. Kim jaýap berdi? Myna jerde otyrǵan ákimniń orynbasary, Eńbek jáne halyqty áleýmettik qorǵaý ministriniń orynbasary, olar kimmen jumys isteidi? Halyqpen jumys isteidi. Olar qazaq tilinde jaýap bermese, onda qalai bolmaq? Ekinshiden, Elbasy keshe ǵana óziniń maqalasynda tikelei aityp ketti ǵoi, memlekettik tildi qurmetteý táýelsizdikti qurmetteý dep. Mine, basynan aiaǵyna deiin Úkimet saǵatyn Vladimir Karpovich (Májilis tóraǵasynyń orynbasary Bojko - avt.) qazaq tilinde júrgizip jatyr. Depýtat Maggeramov myrza taza qazaq tilinde oqydy, bizdiń Snejana Imasheva degen qaryndasymyz qazaq tilinde sóileidi, al Shipovskih bizden jaqsy qazaq tilin meńgergen», - dedi Baqytjan Ábdiraiym.
Osy oraida depýtat memlekettik tilde suraq qoiylsa, sol tilde jaýap berilýi qajettigin qadap aitty.
«Biz buǵan qazir shekteý qoimasaq, osylai jalǵasa beredi. Sol sebepten meniń ótinishim, bolashaqta bizge keletin laýazymdy qyzmetkerler memlekettik tilde suraq qoiylsa, sol tilde jaýap berýge tyryssyn», - dep túiindedi sózin B. Ábdiraiym.
