Shekara beketterinde jolaýshylar aǵynynyń azaiǵanyna qaramastan zań buzýshylyqtar áli de azaiatyn emes, dep habarlaidy QazAqparat.
«Shekaralardyń ashylyp, burynǵy jumys qalpynyń qaita oralý máselesi kezeń-kezeńimen sheshiledi. Ol úshin aldymen keshendi taldaý jumystary júrgizilýi kerek. Bul rette negizgi úsh kórsetkish esepke alynady. Birinshiden, elde epidemiologiialyq ahýal jaqsarýy kerek. Ekinshiden halyqaralyq áýe jáne temirjol qatynastary qalpyna keltirilýi tiis. Úshishiden qazaqstandyqtar barýǵa josparlaǵan eldiń shekaralary ashylýy kerek», - dedi QR UQK Shekara qyzmeti Shekaralyq baqylaý departamenti bastyǵynyń orynbasary polkovnik Oleg Fisenko OKQ-daǵy baspasóz máslihatynda.
Qazirgi tańda osyndai jumys retimen Túrkiiamen áýe qatynasy qalpyna keltirilgen. Ońtústik Koreiadan da reister oryndalýda.
«Shekarashylar shekteý bolsa da, bolmasa da uiymdastyrylǵan ótkizý tártibin saqtai otyryp, jumys isteýge daiyn. Ókinishke qarai pandemiia kezinde de zańǵa qaishy áreketter toqtaityn emes. Shekarashylar elden 7 million qorǵanysh maskasyn, 20 myń respirator men 3 myń qorǵanysh kiimin, 4 mln jup meditsinalyq qorǵanysh qolǵabyn syrtqa shyǵarý faktileriniń jolyn kesti. Sonymen birge jolaýshylar aǵynynyń azaiǵanyna qaramastan bóten jáne jalǵan qujat arqyly shekaradan ótýge tyrysý jaǵdailary da toqtamai tur. Zań buzýshylar avtokólikke jasyrynyp ótýge tyrysady. Odan bólek ruqsat etilmeitin zattardy tasymaldaýǵa tyrysý jaǵdaiy da bar», - dedi ol.
Eske sala ketsek, buǵan deiin Ǵani Aǵadilov Qazaqstan Tótenshe jaǵdai kezinde de, keiin de memleketaralyq júk tasymalyna eshqandai shekteý qoiylmaǵanyn habarlaǵan edi.
