Qazaqstannyń memlekettik shekarasyn karantindik shekteýler kezinde zańsyz kesip ótýdiń jańa túrleri paida boldy. Mundai aqparatty QR Ulttyq qaýipsizdik komitetiniń baspasóz qyzmeti usynyp otyr, dep habarlaidy "Ult aqparat".
Máselen, ótken aptada «Qarasý» avtomobil ótkizý pýnktterinde memlekettik shekarany zańsyz kesip ótýdiń 8 áreketine tosqaýyl qoiyldy: Jambyl oblysy – 1 fakti, Mańǵystaý oblysy - 1 fakti, Aqtóbe oblysy – 1 fakti, SQO – 1 fakti, Qostanai oblysy – 2 fakti, Pavlodar oblysy – 2 fakti.
«Júrgizýshiler halyqaralyq júk tasymalynyń shekaradan ótýine negiz bolatyn ekinshi júrgizýshi retinde jalǵan júrgizýshi kýálikterin qoldana otyryp, shekarany zańsyz kesip ótýge tyrysqan. Atalǵan barlyq jaǵdaida QR Qylmystyq kodeksiniń «Jalǵan qujattardy, mórtabandardy, mórlerdi, blankilerdi, poshta tóleminiń memlekettik belgilerin, memlekettik nagradalardy qoldan jasaý, daiyndaý nemese ótkizý» týraly 385-babynda kózdelgen qylmys belgileri boiynsha tekserý materialdary men kólik quraldary ýákiletti organdarǵa berildi», - delingen taratylǵan aqparatta.
Sonymen qatar 18 qarashada «Qarasý» (Jambyl oblysy), «Jaisań» (Aqtóbe oblysy), «Jańa jol» jáne «Qaraqoǵa» (SQO) ótkizý pýnktterinde jalǵan qujattar men sáikestendirý nómirleri bar avtomobilderdi shekara arqyly zańsyz ótkizýdiń 4 áreketiniń joly kesilgen.
Jalpy, karantindik shekteýler kezeńinde memlekettik shekarany zańsyz kesip ótý úshin jalǵan júrgizýshi kýálikterin paidalanǵan 113 adam (Qazaqstan - 51, Qyrǵyzstan - 30, Ózbekstan - 20, Tájikstan - 7, RF - 5), jalǵan meditsinalyq anyqtamalary bar 35 adam, sondai-aq qazaqstandyq meditsinalyq mekemelerden jalǵan shaqyrýlary bar 42 sheteldik anyqtaldy.
