Ózbekstan prezidenti Shavkat Mirziaev Aq úige saparyn qorytyndylaý jiynynda Ózbekstannyń adam quqyǵy boiynsha osy ýaqytqa deiin qol jetken jetistikterinde “sheginý” bolmaidy dep málimdedi. Bul týraly Azattyq jazdy.
Mamyrdyń 16-sy kúni eki el arasynda jasalǵan “strategiialyq áriptestiktiń jańa dáýiri” atty málimdemede Tramp Mirziaev el biligine kelgeli beri “Ózbekstannyń mańyzdy saiasi, ekonomikalyq jáne áleýmettik reformalar jasaý boiynsha óte úlken jetistikterin moiyndaidy” dep kórsetken.
Mirziaevtyń “ar-ujdan tutqyndaryn bosatyp, bala eńbegin paidalaný júiesinen alshaqtaýǵa jáne kúshtep jumys istetýdi azaitýǵa" kúsh salǵanyn atap kórsetken Aq úi "prezident Tramp prezident Mirziaevtyń Ózbekstandaǵy adam quqyǵy jaǵdaiyn jaqsartý boiynsha ambitsiialyq reformalaryn quptaidy" dep jazǵan.
“Bul jetistikter AQSh-pen ekonomikalyq, saiasi jáne qaýipsizdik boiynsha áriptestiktiń damýyna jol ashty” degen Aq Úi AQSh-qa alǵashqy resmi saparynda Mirziaev eldegi “dini bostandyqty ilgeriletý úshin aiqyn baǵyttarda jyljý mindetin aldy” dep málimdedi.
Al Mirziaev "ózbek halqynyń múddesin birinshi orynǵa qoia" otyryp, eldegi adam quqyǵy jáne bostandyq jaǵdaiyn ári qarai jaqsarta beretinin aitqan.
Ózbekstan prezidenti Shavkat Mirziaevtyń AQSh-qa resmi sapary 16 mamyrda bastaldy. Sapar barysynda eki el arasynda quny 4 milliard dollar bolatyn kelisim-sharttarǵa qol qoiylady dep habarlandy.
