Eskeldi aýdanynda 6000 gektar jerge egilgen kúzdik dándi daqyldardy orý naýqany aiaqtalýǵa jaqyn qaldy. Sharýalar jospar boiynsha sebilgen kúzdik bidaidan 2400 tonna ónim jinap úlgerdi. Ol gektaryna 19 tsentnerdi quraidy. «Nam G.N.» sharýa qojalyǵynda da sońǵy alqaptarǵa oraq tústi.
Sharýa qojalyǵy basshysy German Namnyń sózinshe, mamyr aiynyń aiaǵy men maýsym aiynyń basynda kúzdik bidai eki ret sýaryldy. Bul ýaqytta Qaratal ózeninde sý kóp jáne basqa sharýashylyqtar egistikke az qoldanady. Sý qansha kerek bolsa, sonsha paidalanyp, egistikti kórkeitýge erterek qamdanǵan eken. Nátijesinde ylǵaldyń mol bolýynan gektar túsimdiligi jaqsy kórsetkishterdi baǵyndyryp, sý tapshylyǵy máselesinen jeńil shyǵyp otyr. Ótken jylǵyǵa qaraǵanda sý mólsheri tómendeýinen biyl qajetti sý qorynyń jetispeýshiligi týyndap, egistik alqaptarynda sý tapshylyǵy oryn alǵan edi.
Alqapty aralaý barysynda eskeldilik sharýa astyq daqyldarynyń ishinde barynsha ónimdiligi osy kúzdik bidai ekenin aityp: «Basqa daqyldarǵa qaraǵanda kúzdik bidai aramshóptermen jaqsy kúresedi. Máselen, soiany aramshópterden tazartý áldeqaida qiyn, jumysy kóp. Al kúzdik bidai kúzdegi jaýyn-shashyndy, sondai-aq jaz, kúz sońyndaǵy jáne kóktem basyndaǵy jylýdy tiimdirek paidalanatynymen ótimdi. Topyraqty eroziiadan qorǵaidy. Uiymdastyrý sharýashylyq jaǵynan óte baǵaly jáne anaǵurlym ónimdi. Sondyqtan da men únemi ózimniń áriptes sharýalaryma bidaidy qolǵa alý qajettigin aityp otyramyn. Sebebi, bidai ósirý kez kelgen sharýanyń qolynan keledi», – deidi.
German Nam egistiktegi kúzdik bidaidyń birneshe túrimen tanystyrdy. Sonyń biri – «Alekseich» tuqymy. Ony eki jyl buryn kúzde satyp alǵan. Bul tuqymnyń bir kemshiligi – tyńaitqysh mol sebilip, kóbirek sýarylsa ǵana jaqsy ónim beredi eken. Mysal retinde tyńaitqysh sebilgen jer men qarapaiym tehnologiiamen ósken tusyn salystyrmaly túrde kórsetti. Al «Tritikale» tuqymynan ótken jyly 2 tonna ákelinip, 17 gektarǵa egilgen. Egin túsimi 6-7 tonnany quraidy. Bul tuqymnyń astyq, jem, ámbebap atty úsh túri bar. Astyq tuqymdasynyń jelimtik deńgeii joǵary eken. Bidai túsimdiligi de jaqsy kórsetkishterdi baǵyndyrady.
Astyq jinaý naýqany tolyq aiaqtalǵan soń, iaǵni kúzde «Odesskaia 21» tuqymyn synaqtan ótkizetinin aitty.
Sonymen qatar, German Nikolaevich jerdi tyńaitý úshin qustyń sańǵyryǵyn seýip tastaýdy ádetke ainaldyrǵan. Dálirek aitqanda, tyńaitqyshty Taldyqorǵandaǵy qus zaýytynan tasymaldaidy. Bul azdap qymbatqa túskenimen eginniń bitik shyǵýyna septigin tigizedi eken.
Egistikti aralaý barysynda alqaptaǵy basqa da aýylsharýashylyǵy jumystary qyzyp jatqanyn kórdik.
Zeinegúl JUMABEKOVA
Almaty oblysy, Eskeldi aýdany
