Foto: primeminister.kz
Búgin Astanadaǵy brifing kezinde jýrnalist Ónerkásip jáne qurylys ministrine óz narazylyǵyn ashyq aitty. Búginde qazaq tildi tilshiler sheneýnikterdiń oryssha sóilegen sózin aýdaryp, eki jumys isteýge májbúr, dep habarlaidy Sputnik Qazaqstan.
Brifingte ministr, kóbinese, resmi tilde jaýap berip otyrdy. Arasynda qazaqsha da sóiledi. Biraq tilshiler memlekettik tilde mardymdy jaýap almady.
"Bizge tolyqqandy jaýap kerek. Ózimiz jazatyn tilde jaýap alýǵa quqyǵymyz bar. Mysaly, qazir men aýdarma jasap otyrmyn. Eki jumys isteýge májbúrmin", - dedi tilshi.
Ministr Sharlapaev jýrnalistiń de, aýditoriianyń da ózi qalaǵan tilde jaýap alýǵa quqyly ekenin moiyndaimyn dedi. Sosyn óz oiyn resmi tilde jetkizdi.
"Biraq elimizde, sonyń ishinde memlekettik organdarda qazaq tilin 100 protsent bilmeitin adamdar az emes. Ony ózińiz de jaqsy bilesiz. Olardyń ishinde men de barmyn. Sondyqtan sizdiń eskertpeńiz oryndy. Qazaqsha suraǵandyqtan, qazaq tilinde jaýap berý kerek", - dep atap kórsetti Sharlapaev.
Ministr shetelde kóp júrgenin, biraq tildi úirenýge tyrysyp jatqan adamǵa qatysty mundai narazylyqqa alǵash ret tap bolyp otyrǵanyn da jetkizdi.
"Men bir jarym jyldyń ishide óz oiymdy jetkize alatyn deńgeige jettim. Iá, sizdikindei sózdik qorym joq. Biraq men tyrysyp jatyrmyn ǵoi. Basqa áriptesterime qaraǵanda, sál de bolsa kóbirek jetistigim bar. Alaida "qansha tyryssań da, biz báribir saǵan negativpen qaraimyz" degen kózqarastyń bolǵany durys emes. Shetelge baryp, qytaisha eki sóz, japon tilinde úsh sóz nemese aǵylshynsha tórt sóz aitsańyz, sizge úlken qurmetpen qaraidy. Men jalǵyz osy elde ǵana osyndai negativke tap bolyp otyrmyn", - dedi Sharlapaev.
Ministr qazaqsha suraq qoiatyn jýrnalisterge alǵysyn da aitty. Sebebi "sonyń arqasynda tildi úirenýge múmkindik bar".
Sharlapaev 18 aidan keiin memlekettik tildi jetik meńgerip shyǵýǵa ýáde berdi.
