Qasym-Jomart Toqaev pen Eýropalyq Keńes Prezidenti Sharl Mishel kelissózderden keiin buqaralyq aqparat quraldarynyń ókilderi úshin brifing ótkizdi, dep habarlaidy "Ult aqparat" Aqordanyń resmi saityna silteme jasap.
Memleket basshysy Eýropalyq Keńes Prezidentiniń Qazaqstanǵa alǵash ret resmi saparmen kelip otyrǵanyn atap ótti. Sondai-aq bul biz úshin úlken mártebe ekenin aityp, óziniń shaqyrýyn qabyl alǵany úshin shynaiy rizashylyǵyn bildirdi.
– Kelesi jyly Qazaqstan men Eýropalyq Odaq arasynda diplomatiialyq qatynas ornaǵanyna 30 jyl tolady. Sondyqtan Sharl Mishel myrzanyń sapary osy mereili meje qarsańynda ótip otyrǵany erekshe qýantady. Biz bul saparǵa airyqsha mán beremiz. Prezident Misheldiń Qazaqstan men Eýroodaq arasyndaǵy yntymaqtastyqty nyǵaitýǵa qosyp otyrǵan súbeli úlesin joǵary baǵalaimyz. Biz ekijaqty yqpaldastyǵymyzdy jańa sapaly deńgeige kóterý úshin keń aýqymdy ári mazmundy kelissózder júrgizdik. Kezdesýimiz ózara senim jáne túsinistik rýhynda ótti. Biz mazmundy saiasi dialogtyń qarqynyn odan ári kúsheitemiz dep ýaǵdalastyq. Sondai-aq Keńeitilgen seriktestik jáne yntymaqtastyq týraly kelisim aiasyndaǵy strategiialyq áriptestigimizdi nyǵaitýǵa nietti ekenimizdi rastadyq, – dedi Qazaqstan Prezidenti.
Qasym-Jomart Toqaev Eýropalyq Odaqty Qazaqstannyń eń iri saýda jáne investitsiialyq seriktesteriniń biri ekenin atap ótti. 30 jyl ishinde Qazaqstanǵa Eýropadan tartylǵan investitsiia kólemi 160 milliard dollardan asqan. Al biylǵy 8 aida Qazaqstan men Eýropalyq Odaq elderi arasyndaǵy taýar ainalymy 43 paiyzǵa ósip, 26 milliard dollarǵa jetti.
Memleket basshysy Sharl Mishelmen kezdesý barysynda energetika, «jasyl» ekonomika, aýyl sharýashylyǵy, kólik jáne logistika salalaryndaǵy is-áreketimizge oń baǵa bergenderine toqtaldy. Prezidenttiń aitýynsha, taraptar ózara tiimdi is-áreketimizdi odan ári kúsheitý úshin birlese kúsh-jiger jumyldyrýǵa kelisken.
– Ásirese, asa mańyzdy shikizatty tasymaldaý jáne jasyl sýtegi energetikasyn damytý máselesinde mol múmkindigimiz bar. Sonymen qatar, halyqaralyq kólik dálizderin damytýdyń mańyzdylyǵyn atap óttik. Bul – qazirgi geosaiasi jaǵdaida óte ózekti máseleniń biri. Sondai-aq, Eýropalyq Odaqtyń «Transkaspii halyqaralyq kólik baǵytyn» qoldaý múmkindigin qarastyrdyq. Budan bólek, Eýropa sanktsiialarynyń Qazaqstan ekonomikasyna yqpalyn boldyrmaý máselesin talqyladyq, – dedi Qasym-Jomart Toqaev.
Taraptar demokratiia, adam quqyqtary jáne zań ústemdigin saqtaý salalaryndaǵy dialogty odan ári keńeitý máselelerin de talqylady. Memleket basshysynyń aitýynsha, Sharl Mishel elimizdiń jańa damý kezeńi – Ádiletti Qazaqstan qurý jolynda júzege asyrylyp jatqan aýqymdy reformalarymyzdy qoldaitynyn jetkizdi.
Prezident Qasym-Jomart Toqaev eýropalyq taraptyń túrli baǵdarlamalar aiasynda elimizge kórsetip otyrǵan qoldaýy úshin alǵys bildirgenin aitty.
– Kelissózder sońynda óńirlik jáne jahandyq kún tártibindegi ózekti máseleler boiynsha pikir almastyq. Sondai-aq, Aýǵanstandaǵy qazirgi jaǵdaiǵa, Eýropalyq Odaqtyń Ortalyq Aziia elderimen óńiraralyq qatynastaryna erekshe nazar aýdardyq. Osy rette, men Prezident Sharl Mishelge búgin tústen keiin elordamyzda S5+ formatynda ótetin kezdesýge qatysýǵa shaqyrýymdy qabyl alǵany úshin rizashylyǵymdy bildirdim. Aldaǵy ýaqytta biz halyqaralyq deńgeide kúsh-jigerimizdi biriktirip, úilesimdi jumys isteýge kelistik, – dedi Memleket basshysy.
Sóz sońynda Qasym-Jomart Toqaev búgingi kelissózderdiń tabysty bolǵanyna toqtalyp, yntymaqtastyqtyń basym baǵyttary boiynsha birqatar kelisimge qol jetkizgenderin atap ótti. Memleket basshysy Qazaqstan men Eýropalyq Odaq arasyndaǵy bailanystardy odan ári nyǵaita túsýge Sharl Misheldiń osy sapary eleýli úles qosatynyna senim bildirdi.
Óz kezeginde Eýropalyq Keńestiń Prezidenti Sharl Mishel Qasym-Jomart Toqaevqa jáne qazaq halqyna qonaqjailyǵy úshin alǵys aityp, Respýblika kúnimen quttyqtady. Sondai-aq búgingi kelissózder barysynda mańyzdy kelisimder men basty syn-qaterler talqylanǵanyn aitty.
– Bizdiń bailanysymyz berik, ári Ortalyq Aziia men Eýropa bir-birine jaqyndai túsip, aradaǵy bailanys nyǵaiyp keledi. Qazaqstan – Eýropalyq Odaqtyń mańyzdy seriktesi, sondai-aq halyqaralyq arenadaǵy jáne óńirdegi yqpaldy memleket. Sizdi Eýropalyq Odaq pen Ortalyq Aziia memleketteri basshylarynyń alǵashqy kezdesýin uiymdastyryp otyrǵanyńyzben quttyqtaǵym keledi. Ortalyq Aziia elderimen berik yntymaqtastyq aimaqtyń damýyna jáne qaýipsizdigine jol ashady. Búgingi kezdesý eki óńirdiń arasyndaǵy saiasi dialogtan da joǵary mánge ie, – dedi Sharl Mishel.
